Ang mapatay nga naga-alagad sa malapad nga masa mas mabug-at pa sang sa bukid Kanla-on. Apang ang mapatay nga naga- serbisyo para sa interes sang mga nagahari nga sahi nga agalon may duta, dalagku kumprador burgesya kag burukrata kapitalista mas mamag-an pa sang sa balahibo sang manok.

Si Ka Dante (Ernesto Jude Rimando Jr) isa sa mga kadre nga madugay na nga naga alagad sa malapad nga pumuluyo. Wala pagpangduha-duha nga magbiya sa iya personal nga interes, gingamit ang iya kinaalam kag ikasarang sa handom nga mapamunu-an kag mapaabante ang kawsa para maangkon ang matuod nga kahilwayan kag demokrasya. Siya nagmasakit kag napatay sa kamot sang mapintas nga estado samtang yara sa prisohan tungod sa mga pato-pato nga mga kaso.

Bug-os tagipusu-on nga ginbaton ang responsiblidad nga ginhatag sa iya. Maukod sa pagtuon sang mga MLM nga balasahon kag halos sistimatisado ang filing sa rekord sang mga dokumento. Matutom sa pag-research para magamit sa lain-lain nga linya sang hilikuton ilabe na sa pagpasulong sang mga kontra-pyudal nga awayan sa duta. Isa ini ka dalayawon nga kinaiya kag para sa iya ang sakripisyo kag kabudlayan upod sa malapad nga masang pesante isa na ka normal nga hitabo sa kabuhi bilang isa ka rebolusyonaryo.

Sa hambalanon sang mga banggi-anay sang ideya sa sulod sang organisasyon, maobserbahan ang kinaiya nga magpamati sa mga punto nga ginapaabot kag ginahatagan sang ligwa ang tagsa-tagsa nga makaplastar sang ila mga punto antes magpahayag sang iya opinyon. Maayo man siya magpakig-relasyon sa mga kaupod, mahapos pangayu-an bulig, hipuson, kalmado kag indi arogante nga kaupod.

Dako ang iya naamot sa pagpaabante sang rebolusyonaryo nga kahublagan sang pesante, paagi sa pagbulig nga maduso ang ila mga kontra-pyudal nga paghimakas. Naghatag ini sang dugang nga kusog kag kaisog sa masa nga magpursigi para lab-uton ang katumanan sang matuod nga reporma sa duta. Nagpalig-on man ini sa mga organisasyon masa sa kaumhan nga matukod ang rebolusyonaryong gobyerno nga madugay na ginahandom sang pumuluyo.

Ang paghalad sang iya kabuhi, isa ka bulawanon nga kontribusyon sa rebolusyonaryo nga kahublagan sa Isla sang Negros. Napuno ini sang handumanan kag pagpanghangkat para sa pursigido nga pagpadayon sang mga gintalana nga buluhaton kag kon paano atubangon ang kamatayon bilang mga rebolusyonaryo.###