Antes pa man ang eleksyon 2025, nagpakita na sang mahigko nga kinaiya ang banggaan sa pulitika sa lain-lain nga partido, nga naga-ulamid sa pumuluyo.

Sini nga bulan naglupok ang mga reklamo halin sa pumuluyo sa banwa sang Isabela, Negros Occidental kaangot sa mga barangay health workers (BHW) sa Barangay Mansablay, Barangay 3 kag Barangay 5. Wala sila ginhatagan sang ila sweldo sa sulod sang lima ka bulan nga ₱2500 bangud lang nagbaton sila sang ayuda halin kay Cong. Dino Yulo nga nagabalor sang ₱3,000. Sining nagligad nga Disyembre 19, naglab-ot pa sa mga pagpamahug sa mga tinawo ni Mayor Irene Montilla kon inkaso magreklamo ang mga BHW kag ginpasikto kon diin gid ang ila suporta.

Imbes nga solbaron sang reaksyonaryong gobyerno ang kawad-on sang trabaho kag kanubo sang sweldo nga ginabaton sang mga empleyado kag iban pa nga mga mapiguson kag mahimuslanon nga sistema sang pagtrabaho, mas nagakabalaka pa ini sa pagkakas sa ila sa trabaho antes kag matapos ang eleksyon bangud ginauna ang pamulitika.

Kinaiya na sang pulitika sa Pilipinas, ang amo sini nga mga hitabo sa pamulitika, nagakaipit ang mga empleyado kaangay sa natabo sa mga health workers kon sa diin ginapresyur sa ara sa poder ang tanan nga naga-obra sa reaksyonaryong gobyerno nga mabalitaan nga naga-angot ukon malapit sa oposisyon.

Mas ginpauna ang kaugalingon nga adyenda sang pipila ka pulitiko antes pa ang kaayuhan sang iya ginasakupan. Ginapahigad ang mga indibdwal nga natumod nga indi magboto ukon kontrolado sini kag sa pila ka mga insidente, ginakakas ang mga empleyado nga mabatyagan nila nga indi magsuporta sa ila.

Buot silingon, mabaskog ang politikal nga presyur sa tanan nga empleyado sang panggobyerno kag nadula na ang kinamatarung sang hilway nga magboto sa ila luyag nga mga pulitiko.

Ini nga hitabo, mas nagapaathag sa pumuluyo nga ang eleksyon sa pungsod ang indi magbag-o sang ila pangabuhi kag nagapakita lang nga ang solo nga solusyon para sa pagwasak sa garuk nga sistema sang malapyudal kag malakolonyal sang pungsod amo ang pag rebolusyon.

Ginapakamalaot sang Leonardo Panaligan Command-New People’s Army (LPC-NPA) ang ini nga klase sang kondukta sang mga pulitiko batuk sa mga naga-obra sang matarung.

Ginapangabay sang LPC-NPA sa mga biktima nga mga empleyado nga dapat manindugan sa ila kinamatarung, idemanda ang makatarungan nga sweldo kag benipisyo, seguridad sa trabaho kag pagdula sa iban pa nga porma sag pagpanghimulos.