Mabaskog nga ginakondenar sang Leonardo Panaligan Command-New People’s Army(LPC-NPA) ang desperado nga paggamit sang berdugong 62nd IB sang organisasyon sang NPA sa pagpangilkil sa panimalay ni Bitoy Garsula sa Sityo Patag, Barangay Riverside, Isabela, Negros Occidental sadtong Nobyembre 23,sang gab-i. Nakasibilyan ang nasambit nga militar kag nagpakana nga mga NPA kag gin-into ang pamilya Garsula sang ginkuhaan sang ₱2,000.00 nga kwarta.

Nobyembre 24 sang kaagahon, liwat naman ginkadtuan sang pasistang 62nd IB ang balay sang pamilya Garsula bisan wala sang search warrant nga ginpakita sa nasambit nga pamilya. Pilit nga ginransak ang puluy-an, ginpang-ukay ang mga kagamitan kag ginpangdala sang militar ang personal nga kagamitan sang pamilya lakip na ang wala maisip nga kantidad sang kwarta.

Ikaduha na ka beses nga ginpahug ang pamilya Bersula. Ginpasibangdan sila nga supporter sang NPA.

Suno sa mga residente, sila Remart Dayanan kag Ian Bayno ang naggiya sa iligal nga operasyon sang berdugo kag manugpangilkil nga tropa sang 62nd IB sa pagpanguna ni Col. William Pesase, 62nd Infantry Battalion Commanding Officer.

Makahuluya ang pagpangawat kag pagpangilkil sa mga mangunguma nga ginahimo sang 62nd IB sa kaumahan sang Central Negros. Pasista kag tunay nga terrorista ang matuod nga tatak sang Armed Forces of the Philippines (AFP).

Silotan ang mga traidor sa Pumuluyo sang Central Negros! Silotan ang pasista kag berdugong 62nd IB!###