Ginharas sang yunit sang Romeo Nanta Command-New People’s Army (RNC-NPA) ang naga-operasyong tropa militar sa Sityo Cantupa, Barangay Buenavista, Himamaylan City, Negros Occidental, alas 9:35 sa gab-i, Oktobre 27.

Nagresulta ini sa duha ka pilason sa hanay sang 94th IB. Hinanali nga ginpadul-ong sa mga sibilyan ang ila kaswalidad sa Sityo Buyuron, sa nasambit nga baryo, kag didto ginpakuha sang ila salakyan.

Ginpalupkan sang mga Pulang hangaway ang mga tropa militar halin nagpatrolya sa komunidad. Ginbulubanta nga 80 metros ang gilay-on sang posisyon sa Pulang hukbo halin sa gintineran sang mga kaaway. Nagdagan sang pila pa ka segundo antes ini nagbalos kag daw ido buang nga nagpinalupok sang mga machine gun kag M203 sa bisan diin nga direksyon. Sa pihak bahin, luwas kag tawhay nga nakamaniobra ang yunit sang NPA nga nagtigayon sini.

Nag-abot ang mga berdugong militar sa amo nga lugar sadtong Oktobre 16 kag liwat nga nagaterorisa sa mga residente sa komunidad. Gani, nabaton sa mga Pulang hangaway ang report nga gindumilian man ang mga pumuluyo nga maglakat ukon magguwa sa lugar samtang ara pa ang mga militar. Napilitan sila nga indi pag-atipanon ang ila mga uma kag mga kasapatan bangud sa kahadlok nga mapasibangdan nga may angot sang Pulang hukbo.

Magluwas sini, nagapalapnag ang amo nga mga tropa sang 94th IB sang mga anti-sosyal nga mga aktibidad sa lugar kaangay sang pag-inom sa makahulubog nga ilimnon, pagsugal, kag pagtan-aw sang mga scandal nga nagapanghimulos sa mga kababayen-an. Gani, sang gab-i nga gintigayon ang harassment, nakainom man ang nasambit nga mga tropa militar.

Ini nga taktikal nga opensiba ang sabat sang RNC-NPA sa lapnagon nga pagpanglapas sang 94th IB sa tawhanong kinamatarung sa mga pumuluyo sa nabukid nga bahin sang syudad sang Himamaylan kag Kabankalan, banwa sang Binalbagan, kag mga katambi sini. Madumduman nga halos apat ka bulan na nga naga operasyon ang amo nga batalyon sa amo nga mga lugar nga nakatala sang mga pagpangransak, pagpamahug kag iban pa nga porma sang bayolasyon sa tawhanong kinamatarung.