Nagsimula na ang kampanya para sa reaksyunaryong halalang mid-term kung saan nagsusuwagan ang malalaking warlord at mga dinastiya sa pulitika, habang nilalapastangan ang kapakanan ng mamamayan gamit ang kanilang mga armadong maton, pulis at pwersang militar, sa kanilang pag-aagawan sa pakinabang ng burukrata-kapitalistang rehimen.

Sa harap ng reaksyunaryong kampanya sa halalan, inaatasan ng Partido Komunista ng Pilipinas (PKP) ang Bagong Hukbong Bayan (BHB) na tiyakin ang pangangalaga sa mga karapatan at interes ng mamamayan. Dapat mahigpit na ipatupad ng mga kumand ng BHB sa iba’t ibang antas at sa iba’t ibang rehiyon ang mga umiiral na patakaran ng demokratikong gubyernong bayan kaugnay sa pagsasagawa ng reaksyunaryong halalan sa lugar na saklaw ng kanilang operasyon.

Marapat na ipaalala sa lahat ng mga naghahabol ng pwesto sa reaksyunaryong gubyerno na ang mga patakarang ito na nagtitiyak sa kapakanan ng mamamayan ay mahigpit na ipatutupad ng BHB sa loob ng kanilang mga rebolusyonaryong erya ng operasyon. Ang mga kandidato at kanilang mga tagasuporta ay pahihintulutang mangampanya alinsunod sa mga umiiral na alituntunin.

Pinagbabawalan ang mga pulitiko na magdala ng mga armadong maton at mga eskort na pulis at militar na karaniwang ginagamit para sindakin ang taumbayan. Ang iba pang anyo ng pamimilit, paggamit ng armadong karahasan ay hindi palalampasin, lalo na ng mga burukrata-kapitalista na gumagamit sa pondo ng bayan laban sa mamamayan. May bisa ang mga atas sa BHB na samsamin ang mga armas ng mga kandidato at kanilang mga armadong maton.

Inaatasan ang BHB na targetin ang mga yunit ng AFP at PNP, pati na rin ang mga armadong maton ng mga reaksyunaryong pulitiko, na gagamitin ang kampanya sa halalan sa mga larangang gerilya bilang pantabing sa mga operasyong paniniktik laban sa Partido, sa BHB, sa demokratikong gubyernong bayan at sa rebolusyonaryong masa.

Bago mangampanya sa mga rebolusyonaryong erya, kinakailangang magpabatid ang mga pulitiko at makipag-ugnayan sa mga lokal na yunit ng BHB. Mahalaga ang koordinasyong ito upang maiwasan ang anumang insidente, kabilang ang mga komprontasyon sa pagitan ng mga armadong maton ng magkakalabang pulitiko.

Mahigpit naming kinukundena ang plano ng AFP na gamitin ang nalalapit na halalan bilang panabing sa pagpapatindi ng mga operasyong kontra-insurhensya na kinatatampukan ng sumisidhing pampulitikang panunupil at papahigpit na kontrol ng militar sa mga kanayunan. Layunin ng mga operasyong ito na supilin ang paglaban ng mamamayan at protektahan ang interes ng mga malalaking panginoong maylupa, malalaking negosyo at mga dayuhang kumpanya sa pagmimina at plantasyon. Sa mga nakaraang taon, ang mga operasyong ito ay ginamit din upang tulungan ang kampanya ng mga pulitikong pinapaboran ng militar, lalo na ang mga nakipagsabwatan sa pasistang kampanya ng panunupil.

Sa kabila ng paulit-ulit na pagdeklara na ang BHB ay may isa na lamang “mahinang larangang gerilya,” inihayag ng Philippine Army kahapon na ang kanilang mga yunit ay “nanatiling alerto at patuloy na magsasagawa ng mga operasyon para sa internal na seguridad” upang matiyak ang “kapayapaan at kaayusan” ng halalan. Ang mga operasyong ito ay nagtataguyod ng mga taktika ng “guns, goons and gold” na tampok sa mga nakaraang kampanya sa halalan.

Mahigpit naming hinihimok ang mga kandidato na tanggihan ang mga alok ng armadong seguridad mula sa AFP, dahil ito ay ginagamit lamang ng militar upang isagawa ang pampulitikang panunupil. Ang mga yunit pangkombat ng AFP ay lehitimong target ng BHB.

Ang PKP, BHB at mga organisasyong masa na kaanib sa NDF ay hindi nakikilahok sa halalan. Magpapatuloy ang mga rebolusyonaryong pwersa sa paglulunsad ng digmang bayan laban sa reaksyunaryong gubyernong neokolonyal ng mga naghaharing-uri ng malalaking burgesyang komprador at malalaking panginoong maylupa.

Mula sa rebolusyonaryong perspektiba nito, nagbibigay ang Partido ng kritikal na mga pagsusuri at pananaw sa reaksyunaryong halalan, habang binibigyang diin ang mga pangunahing isyu sa ekonomya at pulitika ng mga mamamayan, at itinatampok ang pangangailangang sama-samang ipaglaban ang kanilang pambansa at demokratikong interes, lalo na ang kanilang kahingian para sa reporma sa lupa at pambansang industriyalisasyon.

Ang mga pagsusuring ito ay tumutulong na gabayan ang taumbayan sa kanilang pagkilos. Ang pagpapataas ng kamalayan ng mamamayan at pagpapalakas ng kanilang organisadong hanay ay susi sa pagtulak nila ng kanilang mga kahingian, habang sila ay humaharap, nakikipaglaban at humahamon sa reaksyunaryong halalan, at pinatitindi ang kanilang laban sa pasista at korap na rehimeng US-Marcos, lalo na sa gitna ng lumalalang krisis sa pulitika at ekonomya.