Ang bisan sin-o man nga indibidwal sa pungsod, naga-edad sang 18 anyos pataas, may maayo nga panglawas kag panghuna-huna, andam ukon handa magbaton kag magsunod sa mga regulasyon, polisiya, mga salsalon nga disiplina sang pulang hangaway sang banwa kag labaw sa tanan bukas kag wala sa kondisyon nga maghikot kag magpatuman sang mga programa sang Demokratikong Rebolusyon sang Banwa; ang pwede kag mahimo nga magpatapo sa New People’s Army.

Taliwas ini sa mga kabutigan kag pagpasibangud sang AFP kag PNP ilabe na ni PCol. Romeo Baleros sang NOPPO. Lab-as pa sa huna-huna sang kadam-an ilabe na sa mga ginikanan sang masobra sa 10 tanan ka minors ang ginlakip sa ilegal seach kag patarasak nga pagpang-aresto sa gintingob nga pwersa sang AFP, CIDG, SWAT kag iban pa nga kapulisan sa mga talatapan sang mga progresibong organisasyon sa Bacolod City sadtong Oktubre 31, 2019 sang hapon.

Gusto lang bawion ni Baleros kag sang AFP ang ila demoralisasyon kag kahuy-anan sa palpak sini nga operasyon batok sa mga progresibong organisasyon. Para ma-justify ang ila pagka-desperado kag kapalpakan, ginpahid naman ini sa NPA. Kuno “gina-training sang NPA ang mga minors bilang mga child warriors.”

Konsentrado kag pormal nga nagalunsar sang paghanas politiko-militar ang NPA sa sakop sang mga Larangan Gerilya indi sa sakop sang sentrong syudad kaangay sang Bacolod.

Tuyo lang ni Baleros upod sa AFP sa pagpanguna ni BGen. Benedict Arevalo sang 303rd Bde PA, BGen. Eric Vinoya JTF-ELCAC Head kag Capt. Cenon Pancito spokesperson sang JTF-ELCAC nga pirme i-angot ang progresibong sektor kag demokratikong organisasyon sa NPA. Tudo-buylo ang mga iresponsable nga mga palayag kag black-propaganda sang pasistang AFP kag PNP agud ikondisyon ang publiko sa ila sistematiko nga crackdown, red tagging kag EJK campaign idalum sa MO#32 kag EO#70 batok insurgency kag sa nasambit nga mga progresibong grupo. Dugang pa, nga pahugon kag pahipuson ang malapad nga pumuluyo kag kritiko sa pagbuyagyag sang mga brutalidad kag pasismo sang tiraniyang US-Duterte.

Kaangot sini, labaw sa tanan nga indi gid malipatan sang pumuluyong Negrosanon subong nga adlaw Nobyembre 6, 2019; ang brutal nga pagtiro-patay (EJK) kay Atty. Benjamin Ramos nga isa ka bantog nga abogado nga tagdepensa sang tawhanon nga kinamatarung sang mga kubos kag ginahimuslan.

Padayon nagapanawagan ang MCC-NPA sa tanan nga progresibo kag demokratikong pwersa; pabakuron ang hanay nga may kaisog sa pagbuyagyag sang kamatuoran sa likod sang pasismo sang estado. Itib-ong ang demokratikong kinamatarung kag interes para sa matuod nga kalinong, demokrasya kag kahilwayan nga nakabase sa hustisya sosyal.

Ginamanduan man ang mga yunit sang NPA kag milisya sang banwa idalum sa MCC-NPA nga magpangita sang mga epektibong taktika kag teknika sa paglunsar sang malapnagon nga taktikal nga opensiba batok sa pasistang AFP, PNP kag kapintas sang tiraniyang US-Duterte. Kag ihatag ang nagakaigo nga hustisya sa mga biktima sang pasismo sang estado sa isla sang Negros.