Agyaman ti Cordillera People’s Democratic Front (CPDF) iti pangibilin ni Governor James Edduba iti iti probinsyal a gobyerno ti Kalinga nga isigurado a ni Victor “Ka Changli” Daligdig ket rumbeng laeng a maikkan isuna iti nanakman a pannakaipumpon. Ti panangited ti nanakman a pannakaipumpon ni Ka Changli ket maysa kadagiti nasasayaat a nainsigudan nga ugali dagiti tribu iti intero a Cordillera inggana iti agdama. Ni Ka Changli ket maysa a kadre ti NPA a pinatay dagiti terorista ken pasista nga AFP idi November 23 idiay Allaguia, Pinukpuk.

Iti bangir na, makaunget ti intero a rebolusyonaryo a tignayan saan laeng ditoy Cordillera no di ket iti intero a pagilian tayo a Pilipinas iti pannawagan ni Governor Edduba kadagiti NPA nga “Makipakaasiak nga bumaba kayon nga NPA ta adda met isabat mi nga pagrugian yo. Adda met itulong ti gobyerno. Adda met ar-aramiden mi tapno ipakita mi nga sinsero kami ti gandat mi nga tumulong. Dakayo a nabatbati ket agsurrender kayon ta saan met a naladaw nga irugi yo ti baro ken natalna a panagbiag…”

Ti panagpasuko ken panagpababa dagiti kakadua nga NPA ti panawagan dagiti kabusor ti umili a Pilipino nga isuda dagiti dadakkel nga apo’t daga ken komprador burgesya tapno siwayawaya da nga itultuloy ti panagkontrol iti bulok a gobyerno ken tapno awan ti lapped iti ipanangipagna da iti sistema ti burukrata kapitalismo. Iti ababa a sarita, ti burukrata kapitalismo ket isu ti bulok a sistema ti tuloy-tuloy a panagtaktakaw iti bilyon-bilyon a pundo ti umili a Pilipino babaen dagiti kickback, korapsyon ken kronyismo. Daytoy bulok a sistema ti burukrata kapitalismo ket isu ti maysa kadagiti kangrunaan a ramut a makagapu no apay agtultuloy nga awan ti kalitatibo ken naan-ay a pang-ekonomya a panagdur-as ti pagilian tayo a Pilipinas. Isu met laeng daytoy ti maysa kadagiti ramut a makagapu iti kinaawan ti pudno a demokrasya ken ti tuloy-tuloy a panagkaro ti kinaprobe dagiti mayorya nga umili iti Pilipinas, nangruna dagiti mangmangged, mannalon, mangngalap ken dagiti pobre kadagiti syudad ti pagilian. Maysa met laeng ti burukrata kapitalismo no apay agtultuloy ti problema ti pyudalismo iti pagilian tayo ken no apay siwayawaya met laeng dagiti ganggannaet a kapitalista ken ti US nga imperialista a sumrek ken agtalinaed iti Pilipinas a mangidikdikta iti panag-andar ti ekonomya ken pulitika iti pagilian tayo ken siwayawaya da a nangipatakder kadagiti US military bases kadagiti 17 nga EDCA (Enhanced Defense Cooperation Agreement) sites ditoy pagilian tayo a Pilipinas.

Ti agtultuloy a kinaadda dagitoy a ganggannaet a kapitalista ken ti US nga imperialista iti Pilipinas ken ti panagdikta dagitoy kadagiti agar-ari a mangidadanes ken managgundaway a dasig dagiti dadakkel nga apo’t daga, dadakkel nga komprador burgesya ken dadakkel a burukrata kapitalista ti agkakomplot a kangrunaan a makagapu iti kinaawan ti pang-ekonomya a panagdur-as ti Pilipinas ken iti kumarkaro a kinapobre ti agarup 105 milyon nga umili a Pilipino manipud kadagiti maidaddanes ken magunggundawayan a dasig ti mangmangged, mannalon ken dadduma pay a marigrigat a sektor ti umili a Pilipino.

Iti agdama, ti tuloy-tuloy a panagtaktakaw iti trilyon ken bilyon-bilyon a pundo ti umili a Pilipino babaen dagiti kickback, korapsyon ken kronyismo ket isu ti dakes ken demonyo nga aramid dagiti dadakkel nga apo’t daga ken dagiti dadakkel a komprador burgesya. Dagitoy dadakkel nga apo’t daga ken dadakkel a komprador burgesya ket isuda met laeng ti nangbukbukel kadagiti burukrata kapitalista a mangkonkontrol iti bulok a gobyerno ti Pilipinas. Iti kinaagpayso, ni President Bongbong Marcos ken dagiti membro ti kabinete na, aggraman ni Vice President Sara Duterte ken dagiti istap iti opisina na ket isuda ti agkarebal a kangrunan a burukrata kapitalista iti nasyonal a tukad iti uneg ti bulok a gobyerno ti Pilipinas iti agdama.

No usigen tayo, ni Bongbong Marcos manipud idi 2022 a panagtugaw na kas presidente ti bulok a gobyerno ti Pilipinas ket limed a tinakaw na ti nasurok P1 trillion babaen iti panangipagna na kadagiti kickbacks, korapsyon ken kroniyismo. Kadagiti hearing iti Kongreso ken Senado, naibutaktak ti panagkokomplot iti baet ni Bongbong Marcos a numero uno a burukrata kapitalista, dagiti congressmen, senators, contractors ken dagiti opisyales ti DPWH, Department of Budget and Management ken dadduma pay a bulok nga ahensya ti bulok a gobyerno iti tuloy-tuloy a panangkurakot iti bilyon-bilyon a peso manipud kadagiti DPWH projects, lalo kadagiti flood-control projects.

Iti met bangir ni Sara Duterte, bilyon-bilyon met ti tinakaw ti pamilya da a nagrugi idi panawen ni tatang na a ni autokratiko Rodrigo Duterte a nang-iggem kadagiti nasurok 14,000 anomalous projects kas kadagiti highways, flyovers, bridges, airports, ports, ken crossings. Bilyon-bilyon a peso ti tinakaw ti pamilya a Duterte manipud iti Pharmally contract idi panawen ti COVID-19, ti ₱51 billion flood control project ni Paolo Duterte, ken ti ₱125 million confidential and intelligence fund ni Sara Duterte. Kasta met a bilyon-bilyon a peso kadagiti project contracts met ti napan kenni Senator Bong Go a dati nga aide wenno assistant ni pasista a Duterte ken kadagiti dadduma pay a managtaktakaw nga alyado da.

Dagiti opisyales ti military ken ti NTF-ELCAC (National Task Force-End Local Communist Armed Conflict) ket tuloy-tuloy met laeng iti panagtaktakaw da kadagiti bilyon-bilyon a peso manipud kadagiti maanomalya a proyekto. Bilyon-bilyon met laeng ti public funds ket tuloy-tuloy nga us-usaren ti pasista ken terrorista nga AFP ken kasta met ti NTF-ELCAC para kadagiti adu nga awan-serbi a proyekto iti uneg ti makun-kuna a “Barangay Development Program.”

Masapul ngarud a mapamulatan, maorganisa ken mamobilisa ti umili a Pilipino tapno labanen ken gibusan ti malakonyal ken malapyudal a sistema, ken ti reaksyonaryo a panagar-ari dagiti burukrata kapitalista, dadakkel a komprador burgesya ken dadakkel nga apo’t daga. Ngem masapul nga annugotan tayo nga ti aspirasyon ti umili a Pilipino, agraman dagiti nainsugudan nga umili iti Cordillera, para iti sosyal a hustisya, pudno a demokrasya ken naan-anay a nailian a wayawaya ket magun-od laeng babaen iti rebolusyonaryo nga armado a pannakidangadang. Ti gubat ti umili a napinget nga ipagpagna ti NPA ket isu laeng ti rumbeng a solusyon tapno marippuog ti agdama a bulok a gobyerno ti Pilipinas ken masukatan iti baro ken pudno a demokratiko a gobyerno.