Nagalambid ang dila kag sinakaan-hangin ang ulo ni Major Panchito sang ginpaggwa nila sa media ang binutig nga may natabu nga enkwentro sa tunga sang AFP kag NPA sadtong Hunyo 6, 2020, sa boundery sang Brgy. Tigbanaba kag Sityo Mahi, Corucuan, Igbaras, Iloilo, pila lamang ka metros halin sa ila detatsment sa Brgy Igtalungon, Igbaras, Iloilo. Suno sa ila fake news, naglawig sang 20 minutos ang linukpanay sa tunga sang ila pwersa nga 61st IB kag sang Sibat Pltn sang NPA Southern Front-Panay. Nagpinalagyo kuno sa kahadlok ang 10 ka katapu sang NPA kag nagkalawigit pa ang mga kagamitan.

Mabaskog namon nga ginapanginwala ini– wala sang enkwentro nga natabu. Ang nasambit nga lugar kabahin sang amon area of operation kag ginaklaro namon, nga sa amo nga panahon, wala sang yunit sang NPA didto. Isa ato ka rehearsed nga aksyon. Magluwas sa ila treyning militar, nagahingamo pa guid ang AFP nga himuon nga artista ang ila mga suldado sa ila drama nga mga enkwentro. Marso 2019, ginpaggwa man nila nga may enkwentro nga natabu antes nila dakpon ang 3 ka mga mangunguma sa Brgy. Mulangan Igbaras, Iloilo. April 2020, ginpaggwa man nila nga may enkwentro nga natabu sa boundery sang Miag-ao, Iloilo kag Sibalom, Antique sang ila ginpatay ang isa ka lider mangunguma kag ginpangdakop ang 11 pa ka sibilyan. Idugang naman nila ang ining natabo sa Igbaras, Iloilo sa ila ginahuman nga Collection of Fake Encounters Series.

Nabatyagan nila ang katalagman sa mga pagmaniobra sang NPA lapit sa ila kag naglubong man sang ungon sa ila pamensaron ang mga pagpang-atake sa ila mismo mga detatsment. Ang kaangay sini nga mga drama, kabahin sa ila desperado nga mga pagpaninguha nga magpakitang-gilas sa pihak sang nagalapad kag nagabaskog nga rebolusyonaryong gahum sa kaumhan. Ginahimo nila ini para mangin lehitimo ang ila mga operasyon kombat sa erya kag makatanum sila sang kakugmat sa pumuluyo nga nagasuporta sa NPA. Tuyo sini nga madulaan sang baseng masa ang NPA.

Apang kun sa diin ang imol, didto ang NPA para pahangpon, organisahon kag pahulagon ang pumuluyo agud ipagpakigbato ang ila mga kinamatarung. Padayon nga magapalapad ang NPA sa pagmaniobra sa erya lampas pa sa mga detatsment sang kaaway. Indi asta san-o man mahubsan sang masa ang NPA sa baylo, padayon ini nga suportahan sang nagalapad kag nagasingki nga pagbato nila.

Indi magpati sa mga drama kag binutig sang AFP!
Hibalu-on ang kamatuoran paagi sa pag-entra sa New People’s Army!