Sandig sang deklarasyon sang Partido Komunista sang Pilipinas, hugot nga ginpatuman sang Romeo Nanta Command-NPA (RNC-NPA) ang ‘ceasefire’ isip pagpakighiusa sa masang Negrosanon nga nagaselebrar panahon sang paskwa. Apang nagpabilin ini nga mabinantayon sa mga maniobra sang AFP, partikular na sang 94th IB, ilabina nga nagpagawas ini sang mga kontra-kalinong kag kontra-pumuluyo nga mga pahayag antes ang adlaw sang paskwa.

Pamatuod sang ila berdugo kag pasista nga kinaiya ang padayon nga pag-opereyt sa komunidad sang South Central Negros kon sa diin nakabaton ang yunit sang mga report sa pagpangsaka sang mga kabalayan, panghadlok (psywar) kag interogasyon sang mga pumuluyo.

Sa Kabankalan City, ara ang presensya sang 8 ka kolum sa mga sitio sang Andoy, Mansawin, Kulambo, Nabalikan, Bigo, Mugni, tanan sakop sang Barangay Oringao; sa Sitio Atimon, Tara, Pangkulan, Bayongbong, Danlugon, Bahi sakop sang Barangay Tan-awan; kag sa Sitio Bunyuron, Balao, Bubon, Palawis kag Bula sakop sang Barangay Carol-an.

Samtang sa Himamaylan City, wala untat ang operasyong militar diri halin pa sang Oktubre 17, 2025 ilabina sa Sitio Cantupa, Asaran, Buyoron, Manhoy, tanan sakop sang Barangay Buenavista. Pabalik-balik man gihapon ang pasistang 94th IB sa Sitio Camuag, Lunoy, Tugas, Kasipongan, Tapol, kag Medel sa Barangay Carabalan. Dugang diri ang mga bag-ong abot nga mga tropa militar sini nga semana nga naga-opereyt sa Sitio Cabadiagan kag Palo Sais, sa Barangay Mahalang kag Sitio Nahulop, Barangay San Antonio.

Militarisado man gihapon ang banwa sang Binalbagan kon diin ara sa mga 8 ka tapok ang nagpangsaka-saka sang mga kabalayan sa Sitio Gulinggan, Lumboy, Apitong, Mag-anay 1 sakop sang Barangay Biao kag sa Sitio Sisang, Namulo, Kabite, Amilis 1 kag 2, kag Kapaklan sa Barangay Santol.

Imbes na mangin malinong ang paskwa sang mga Negrosanon, nagamo ini sang kalakasan nga ginapalapnag sang 94th IB. Gani, nagapangabay ang yunit nga magtib-ong ang pumuluyo sa pagdemanda nga untaton na ang militarisasyon sa kabukiran.