Walay hunog ang mga operasyon militar sa Armed Forces of the Philippines (AFP) sa upat ka lungsod ug usa ka syudad sa Negros Oriental.

Sugod niadtong bulan sa Enero 2024, gipailawom sa Retooled Community Support Program (RCSP) sa mga tropa sa 11th IB ang upat ka mga barangay sa Siaton: Barangay Casalaan (sa proper ug sa ginatawag nga Bulski); Barangay Napacao (mga sityo sa Balaskan ug Kaduldulan); Barangay Tayak (Sityo Salingkubong) ug sa Barangay Apoloy (ara sa Proper).

Sa Santa Catalina, nagpundo ang mga pwersa militar sa mga sityo sa Tamlang ug Avocado sa Barangay Talalak hangtod karon.

Lakip sa mga aktibidad sa 11th IB mao ang pagpahigayon og curfew matag alas-7:00 sa gabii, tagsa-tagsa nga nagpatawag sa lumulupyo ilabi na kadtong gitudlo sa mga ‘surenderi’ ug gihulga sila. Nagpasiugda usab ang militar og mga sugal susama sa tari ug baraha.

Samtang, dinagkuan nga operasyon ang gipahigayon sa 11th IB (nga molanat og halos tag-18 ka adlaw) sa lungsod sa Pamplona, sugod niadtong ikaduhang semana sa Septyembre. Apektado niini ang mga barangay sa Balayong, Banawe, Fatima, Inawasan, San Isidro ug Yupisan.

Nagpabilin pa gihapon ang presensya sa nasambit nga militar sukad niadtong Oktobre 12 hangtod karon sa mga sityo sa Cangque, Pasto, Bodega, Busay ug sa proper sa Barangay Santo Niño, Tanjay City. Girekisa ang mga tawo nga mag-agi sa ilang giposisyonan ug nagpahigayon usab sila og curfew matag alas 7:00 sa gabii.

Aduna usab nareport nga insidente nga may isa ka clan nga gi-interogar sa walo ka mga asset sa 11th IB sa Barangay Ali-is, Bayawan City. Gipugos sa mga asset ang mga biktima sa pagpaangkon nga nagpatulog sila og NPA sa ilang balay. Gipa-blotter sa mga biktima ang maong panghitabo.