Niadtong Septyembre 10, pasado alas-12:00 sa tungang gabii, gisaka sa mga tropa sa 62nd IB ang balay ni Be-ann Belando sa Sityo Alamag, Barangay Linantuyan, Guihulngan City, Negros Oriental. Gipakanaug siya kuyog ang iyang anak nga menor de edad nga si Jimson Belando, 14 anyos.

Gipangtionan sila og armas sa nasambit nga militar. Samtang diha sila sa silong sa ilang balay, gidala sa mga sundalo sa layo si Be-anne ug gi-interogar kini ug giipit sa mga militar nga may kalambigitan ug nagsuporta sa rebolusyonaryong kalihokan. Alas 2:00 na sa kaadlawon nga gipasaka sila og balik sa ilang balay.

Kadungan ani nga panghitabo, gisaka usab ang balay ni Rose Carillo Michael Agbon sa amo gihapon nga lugar. Kini nga mga biktima nakasinati og pagpang-ipit ug pag-interogar sa mga pasistang sundalo, kakuyog ang masupog na traydor nga rebolusyon nga si Snoky Meheyo.

Samtang, sa Sityo Tagbak, Barangay Trinidad, sa nasambit nga syudad, gipakanaog sa mga sundalo si Michael Largado ug gitionan siya og armas niadtong Septyembre 4. Giimbestigar siya sa nasambit nga militar ug pugos nga gipaangkon nga nagsuporta ug nagpasaka siya og NPA. Dili pa kini paigo, gidala ug gipakuyog pa sa mga sundalo ang 64 anyos sa pagpangsulahog sa mga lasang. Pagkasunod nga mga adlaw, sa Septyembre 6, gipatawag ug gipaadto sa lungsod ang mga biktima apan wala sila giatubang sa mga hungog nga sundalo.

Ingonman, niadtong Septyembre 4, sa mga alas-5:00 pasado sa buntag, gipalibutan ug gisaka sa mga pwersa sa 62nd IB ang balay ni Judith Maque, 64 anyos, lumulupyo sa Sityo Tubod, Barangay Macagahay, Moises Padilla, Negros Occidental.

Ang ingon ani nga iskema sa mga pasistang militar nagmugna og grabeng kahadlok ug kalisang sa lumulupyo sa kabukiran ug pagkaguba sa ilang panginabuhian.Tungod niini, dugang kini nga mosugnod sa kaisog sa katawhan para sa madilaabon nga panaghiusa ug pakigbisog para sa tinuod nga demokrasya ug kagawasan.