Nagdaghan na usab ang mga bayolasyon sa 62nd IB sa tawhanong katungod sa mga syudad sa Guihulngan ug Canlaon.

Niadtong Septyembre 16, mga alas-9:00 sa buntag, gipaadto sa barangay hall si Lorna Bayato, 39 anyos, minyo ug may mga anak, nagpuyo sa Sityo Bungaw, Barangay Trinidad, Guihulngan City, Negros Oriental, kay gipatawag siya sa mga sundalo sa 62nd IB sa nasambit nga barangay.

Gikombinsi ang biktima nga mamahimo nilang informer apan wala mosugot si Bayato. Pero giingnan siya sa nasambit nga militar nga kung dili siya musugot sa ilang tahas, sigehon siya ug ipit sa mga sundalo. Gihulga sab siya nga i-post sa Facebook ang iyang picture ug himuon siya nga ‘surenderee’.

Samtang, gikulata sa nagsuroy-suroy nga sundalo nga sakop sa 62nd IB si Jimboy Patoc, ulitawo, sa Sityo Taloto, Barangay Linantuyan, sa nasambit nga syudad. Giila ang sundalo nga si Sertin Domiggo nga nagpuyo ra usab sa maong barangay.

Sa laing bahin, niadtong Septyembre 12, mga alas-10:00 sa buntag, gipatawag usab sa 62nd IB si Bebian Maribong, 29 anyos, minyo, nagpuyo sa Sityo Uyangan, Barangay Budlasan, Canlaon City Negros Oriental sa ilang barangay hall sa nasambit nga lugar. Giimbestigar siya sa mga sundalo ug gipugos nga pasugiron sa iyang nahibaloan kalabot sa NPA.

Gibati ug grabeng kalisang ug kabalaka si Maribong ug ang iyang pamilya para sa ilang seguridad ug kaluwasan. Nahadlok usab siya nga balikon sa mga sundalo ug ipatawag pag-usab.

Ang tanang biktima sa pagpanglapas sa tawhanong katungod sa mga sundalo nakasinati og grabeng kabalaka ug kahingawa sa ilaha ug sa ilang pamilya para sa ilang kaluwasan.

Apan bisan pa sa ilang nasinati,nagdugang kini og hagit sa katawhan nga mubarog ug manlingkasog para sa tawhanong katungod.

Makigbisog, dili mahadlok para sa tinuod nga kagawasan aron makab-ot ang tinuod nga hustisya nga makita diha sa panaghiusa sa katawhan nga gihimuslan ug gidaug-daug sa pasismo ug sistemang mapahimuslanon.