Gitudlo niadtong Agosto 19 sa National Democratic Front of the Philippines (NDFP) isip temporaryong pangulo sa negotiating panel niini si Julieta de Lima isip puli sa mipanaw niining lider nga si Fidel Agcaoili.

Matud kang NDFP chief political consultant Jose Ma. Sison, si de Lima ang pinakasinyor sa mga ginsakpan niini sa gawas sa nasud aron ipadayon ang pakiglambigitay sa mga tigpatunga sa peace panel.

Wala nagdali ang NDFP nga tangkapan ang nabakanteng mga pusisyon ni Agcaoili, ingonman ni Randall Echanis nga gipatay niadtong niaging semana. Matud ni Sison, “adunay panahon ang NDFP nga subling tibuukon ang mga working committee ayha subling magsugod ang panaghisgot pangkalinaw, lagmit kung wala na si Duterte sa poder.”

Kanhing gipanguluohan ni Agcaoili ang Joint Secretariat ug Joint Monitoring Committee ilalum sa Comprehensive Agreement on Respect for Human Rights and International Humanitarian Law (CARHRIHL).