Gidakop ang aktibistang si Amanda Lacaba Echanis ug iyang usa ka bulang anak sa gipuy-an niining balay sa Barangay Carupian, Baggao, Cagayan niadtong Disyembre 2. Myembro si Echanis sa Amihan ug nag-organisa sa mga kababayen-ang mag-uuma.

Kasamtangang gipriso si Echanis sa Camp Adduro, Tuguegarao subay sa gama-gamang kasong illegal possession of firearms and explosives. Anak siya sa gipatay nga konsultant sa National Democratic Front of the Philippines nga si Randall Echanis.

Matud sa Karapatan, adunay mga gibayaran ang National Task Force to End Local Communist Armed Conflict (NTF-ELCAC) aron mahimong “saksi” batok kang Echanis. Sa parehong barangay, kadungan nga giutingkay ang balay ni Isabelo Adviento, lider sa Danggayan-Kilusang Magbubukid ng Pilipinas.

Giaresto usab sa pulisya sa gama-gamang kasong rebelyon ang organisador sa unyon sa transportasyon nga si Jose Bernardino sa Sapang Maisac, Mexico, Pampanga niadtong Disyembre 4.

Kadungan niini, giaresto sa kasong illegal possession of firearms and explosives si Marilou Tan sa San Roque, Tinambac, Camarines Sur. Parehong gilunsad sa kaadlawon ang mga operasyon.

Sa Albay, giaresto ang 72 anyos nga mag-uumang si Ronaldo Ogama sa iyang balay sa Barangay Batbat, Guinobatan niadtong Nobyembre 17. Giakusahan siyang myembro sa BHB.

Sa Kitaotao, Bukidnon, giaresto ug gitortyur sa 16th IB ang 17-anyos nga mag-uumang si Ruben Dano niadtong Nobyembre 19 sa Barangay Balangigay. Human niini, gitortyur sa 16th IB ang unom ka minoryang mag-uuma ug ang tiguwang nga si Carlito Sordilla.

Sa Surigao del Norte, giaresto sa 29th IB si Datu Danilo Kalinawan sa Barangay Cawilan, Tubod niadtong Disyembre 2 sa kaadlawon. Wala pa siya nakita sa pamilya hangtud karon.

Upat ka babayeng residente sa Maysapang, Barangay Ususan, Taguig City ang giaresto human pugngan ang pagpangutingkay sa armadong mga maton sa R-II Builders sa lugar. Dugay nang adunay hulga ang kumpanya nga idemolis ang maong komunidad.

Masaker sa South Cotabato. Duha ka Pulang manggugubat nga walay katakus nga makasukol ang gipatay sa 5th SFB ug PNP sa Sityo Kibang, Barangay Ned, Lake Sebu, niadtong Disyembre 2, alas-4:30 sa buntag.

Naila ang mga biktima nga silang Romeo Libron (Ka Melvin), 60, ug Ka Sarge. Gipatay usab sa mga pasista ang tulo ka sibilyan nga mibisita sa maong adlaw, lakip ang asawa ni Ka Melvin.

Pagpatay. Gipusil ug napatay ang purok lider nga si Ignacio Moraca Arevalo sa lokal nga pulis ug 29th IB sa Barangay Mat-i, Surigao City niadtong Nobyembre 25. Si Arevalo ang lider sa Nagkahiusang Gagmayng Minero.

Gipatay usab sa PNP-Sison si Josefino “Lalo” Calang, usa ka negosyante, bandang alas-12 sa gabii sa Nobyembre 26. Giakusahan siyang myembro sa milisyang bayan sa BHB.

Pagpamomba. Pipila ka hugna nga giistraping ug tulo ka beses nga gikanyon sa AFP Northern Luzon Command ang Barangay Lawak Langka, Mangatarem, Pangasinan niadtong Nobyembre 24. Pipila ka adlaw nga naparalisa ang panginabuhian sa mga residente tungod niini.

Naghulog usab og pito ka bomba ug nag-istraping ang 29th IB sa mga komunidad sa Santiago, Agusan del Norte niadtong Nobyembre 25.