Sa pagpanguna sa Kilusang Mayo Uno, nagprotesta ang kapin 6,000 ka tawo sa University of the Philippines, Diliman, Quezon City niadtong Nobyembre 30. Gipanawagan nila ang kaluwasan, trabaho ug katungod.

Gibatukan nila ang nagapadayong red-tagging sa rehimen ug ang pagpatuman sa Anti-Terror Law nga gigamit aron sumpuon ang mga kritiko niini. Matud nila, gigamit sa mga upisyal-militar ang pagdungog sa Senado niadtong Nobyembre 24 aron magpakaylap og disimpormasyon ug bakak kalabot sa mga lehitimong demokratikong organisasyon ug kongresista.

Kadungan sa adlaw natawhan ni Andres Bonifacio, gidumdum usab sa mga kabatan-onang aktibista ang ika-22 nga anibersaryo sa Anakbayan. Nagsaad sila nga ipadayon ang pakigbisog ni Bonifacio alang sa nasudnong demokrasya ug kagawasan.

Sa Baguio City, nagtigum ang mga aktibista sa Malcolm Square. Gibabagan nila ang pagtanyag sa lokal nga gubyerno sa katungod sa SM Prime Holdings aron pahapsayon ang Baguio City Market. Matud nila, gibasura sa syudad ang rekomendasyon sa mga magtitinda batok niini. Hugot usab nilang babagan ang red-tagging sa rehimen sa mga aktibista sa rehiyon.

Kadungan niini aduna usay programa sa mga lungsod sa Sta. Rosa, Cabuyao ug Calamba sa Laguna ug Plaza Miranda, Angeles City sa Pampanga. Sa Panay, nagprotesta usab ang Kadamay sa Jaro, Iloilo samtang aduna usay programa sa Kalibo, Aklan ug Roxas City, Capiz. Aduna usay protesta sa Bayan-Negros sa Bacolod City. Adunay nahitabong kagubot sa Mandaue City, Cebu ug Balanga, Bataan human giatake sa mga pulis ang mga raliyista. Sa Davao, aduna usay protesta sa Bankerohan Public Market ug Freedom Park, Roxas Avenue nga gipangunahan sa Kilusang Mayo Uno-Southern Mindanao.

Gidumdum usab sa maong adlaw ang ika-56 anibersaryo sa Kabataang Makabayan.