Gitamastamasan sa Armed Forces of the Philippines (AFP) ang patayng lawas ni Jevilyn Cullamat, manggugubat sa Bagong Hukbong Bayan (BHB) nga napatay sa usa ka engkwentro sa Marihatag, Surigao del Sur niadtong Nobyembre 28. Gipakaylap sa mga sundalo sa 3rd Special Forces Battalion ang usa ka litrato sa midya ug social media kung usa nakaladlad ang iyang patayng lawas na daw tropeyo sa nagpalitratong mga sundalo.

Si Cullamat ang kinamanghurang anak ni Bayan Muna Rep. Eufemia Cullamat. “Gihigugma ko ang akong anak nga naghigugma sa katawhan. Gipasigarbo nako siya. Bayani siya sa mga Lumad ug sa tibuok katawhan,” matud sa iyang inahan.

Lapas sa internasyunal nga makitawhanong balaod ang pagtamastamas sa patayng lawas ug pagpangbastos sa pamilya sa napatay. Gigamit usab kini alang sa malisyosong pag-red-tag sa Bayan Muna ug pagpamugos sa NTF-ELCAC nga isalikway niini ang komunismo ug armadong pakikibaka. Gibalibaran kini sa Bayan Muna ug gipanawagan na hinuon ang mga ugat sa armadong panagsangka.

Dili na bag-o ang maong binuhatan sa AFP. Niadtong Mayo 13, gibalandra sa 23rd IB sa tunga-tunga sa komunidad sa Gingoog City ang mga patayng lawas sa 10 ka Pulang manggugubat nga napatay sa pagpamomba niini. Gipalaray sa mga sundalo ang mga residente ug gipakita kanila ang bitas-bitas na nga mga patayng lawas.

Sa Davao del Sur niadtong Abril 2018 gipatay sa militar si Jhun Marck Acto, 15 anyos, ug usa pa ka 16-anyos sa Barangay Manila de Bugabos, Butuan City niadtong Nobyembre 2019, gikuhaan sa litrato ug gipagawas nga mga membro sa BHB.

Puno kaayo sa susamang mga litrato sa patayng lawas sa mga sibilyan ug manggugubat nga gipatay sa sundalo ang mga website ug akawnt sa social media sa AFP.