Kanunay ginayawit ni Rodrigo Duterte ang pagpaabot sa bakuna isip estratehiya aron makahulagpos sa pandemyang Covid-19. Kanunay ang pagpanghinambog niini sa planong bakunahan ang 75% hangtud 80% populasyon sa Pilipinas. Ingonpaman, wala kini tin-aw nga plano sa pagpalit, pagtipig ug distribusyon alang niini. Wala pa daw gihapoy pondo ang gubyerno ug ginasalig niini sa pribadong sektor ang pagpalit sa gikinahanglang dosis.

Sukad Nobyembre, sunud-sunod ang anunsyo sa “czar” sa bakuna nga si Gen. Carlito Galvez sa planong pagpalit sa Pilipinas sa mga bakuna gikan sa dagkung kumpanya sa parmasyutika. Kanunay ang saad niyang makaabot na sa Pilipinas ang bakuna sa una o di kaha sa ikaduhang kwarto sa 2021.

Haw-ang ang maong mga saad tungod kay una, wala pa nahuman ang testing sa kadaghanan sa mga bakuna, ug ikaduha, limitado ang ihap sa bakunang gigahin sa dagkung kumpanya sa gagmayng nasud sama sa Pilipinas. Ang gipirmahan pa lang ni Duterte sa kasamtangan mao ang pagtugot sa paggamit sa maong mga bakuna sa mga kalit nga panghitabo (emergency-use) gikan Enero 2021.

Lakip sa mga gipanghinambog sa rehimen ang plano niining mopalit og 50 milyong dosis sa bakuna gikan sa Sinovac (China) ug 2.6 milyong dosis gikan sa AstraZeneca (UK). Nagapangayo pa lang og permiso ang duha ka kumpanya nga maglunsad og testing sa nasud.