Baseng masa, lumalawak sa Cagayan Valley
Patuloy na lumalawak at lumalalim ang suportang masa sa makatarungang digmang bayan. Ito ang inihayag ni Elias Almazan, ang pampulitikang upisyal ng Bagong Hukbong Bayan (BHB)-Cagayan Valley (Fortunato Camus Command). Sa panayam ng Baringkuas (rebolusyonaryong pahayagan sa rehiyon), idiniin niya na hindi nahadlangan ng maiigting at masinsing mga operasyon ng Armed Forces of the Philippines (AFP) at Philippine National Police (PNP) ang paglawak at pagkonsolida ng rebolusyonaryong baseng masa sa rehiyon.
Ani Ka Elias, habang abala ang AFP at PNP sa paglulunsad ng mga laking-batalyon o brigadang operasyong militar at matagalang mga operasyong Retooled Community Support Program (RSCP) sa mga baryo, nakapagparami at nakarekober ang mga yunit ng BHB ng dumaraming bilang ng mga baryo at bayan na hindi saklaw ng mga nakapokus na operasyong militar. Nadagdagan ng ilang libong bagong kasapi ang baseng masa ng mga larangang gerilya mula 2020.
Hindi lamang naaabot ng mga platun ng BHB ang magkakarugtong na mga baryo at komunidad sa mga interyor at gilid ng mga kabundukan, kundi pati ang kapatagan at tabing mga haywey at dagat.
Aniya, sa lahat ng mga lugar na nirekober ng hukbo, mainit pa rin ang pagsalubong sa kanila ng masa, lalo iyong mga nagdurusa sa kahirapan at pagsasamantala.
Walang kwenta at lantay na propaganda lamang ang ginagawa ng militar na pamimilit sa mga lokal na gubyerno na ideklara ang BHB bilang “persona non grata.” Ito ay dahil ang taumbaryo mismo ang humihiling na saklawin ng BHB ang kanilang lugar para idulog ang kanilang mga suliranin.
Kabilang sa mga tampok na suliranin ang laganap at iba’t ibang anyo ng pangangamkam ng lupa. Pangunahing isinasagawa ang mga ito ng malalaking panginoong maylupa, pribadong kumpanya, ahensya ng gubyerno at kasapakat nitong mga kontraktor.
Dagdag dito ang sari-saring anyo ng malapyudal na pagsasamantala kagaya ng napakataas na interes sa pautang at iba pang porma ng pang-uusura, mababang presyo ng produkto ng magsasaka, at mga anyo ng komersyanteng pandaraya sa pagbili sa kanilang mga produkto. Ani Ka Elias, “para sa masa, ang BHB lamang ang nakikita nilang tapat at masiglang naghahapag ng wastong solusyon sa mga usaping kinakaharap nila.”
Patuloy na nakikilusan at hindi naiiwanan ng BHB ang mga baryo at bayan na saklaw ng matagalang operasyon ng RCSP. Upang lihim na maabot ang mga ito, nagpapadala ang mga platun ng mas maliliit na yunit para umugnay sa masa at maglunsad ng mga kakayaning gawain.
“Inutil ang mga operasyon at saywar ng kaaway dahil madaling maunawaan ng mamamayan na ang AFP ay nagpapanggap lamang na nagbago na mula sa katangian nitong kontra-mamamayan.”
Puhunan ng hukbong bayan ang rebolusyonaryong kamulatan na ilang dekada nang naitanim at sumibol sa hanay ng mamamayan. Lumalawak ang saklaw na teritoryo at dumarami ang mga baryo at klaster ng mga baryo na natatayuan ng mas matataas na antas ng mga rebolusyonaryong organisasyong masa at kani-kanilang mga organo ng Pulang kapangyarihang pampulitika.
“Kahit pa iniuuna sa kasalukuyan ang pagpapalawak, kailangan ding ikumbina ito sa pagpapatatag ng baseng masa,” pagwawakas niya.