Iligal nga giaresto ang tulo ka konsultant sa National Democratic Front of the Philippines (NDFP) sa mga pwersa sa militar niining milabayng duha ka semana. Duha kanila ang wala pa gipakita. Samtang, duha ka lider masa nga lambigit sa kampanyang elektoral ang magkasunod nga gibaharang patyon ug 13 ka sibilyang Lumad ang iligal nga gipreso.

Gidagit sa mga elemento sa Eastern Mindanao Command sa AFP si Ezequiel Daguman, konsultant sa NDFP sa Southern Mindanao. Sukad pa Marso 7 nawala si Daguman. Gidagit siya samtang nagbyahe padulong sa komunidad sa mga mag-uuma sa New Corella, Davao del Norte. Nakatakda unta siyang makigkonsultahanay sa mga mamumuo ug mag-uuma sa plantasyon.

Sa Northern Samar, gidagit sa militar ang konsultant nga si Edwin Alcid, naila isip Ka Veejo, ug duha niyang kaubang sibilyan niadtong Marso 8 sa Barangay San Jose, Catubig. Si Ka Veejo, 74 anyos, adunay diabetes ug kinahanglan og medikal nga pagtagad. Wala pa gihapon gipalutaw sa AFP si Ka Veejo, retiradong kadre sa Partido Komunista ng Pilipinas. Matud sa taho, duha ka helikopter sa AFP ang mitugpa sa baryo aron kuhaon sila.

Usa pang konsultant, si Ramon Patriarca, ang iligal nga giaresto niadtong Marso 18 sa Negros. Kauban sa giaresto sila sa Carmen Jonahville Matarlo ug John Michael Baldonado, mga aktibistang tigpanukiduki nga nagpahigayon og imbestigasyon sa mga asyenda sa pamilyang Cojuangco sa Sityo Tondo, Barangay Suay, Himamaylan, Negros Oriental. Gipasakahan sila og hinimo-himong kaso.

Pakyas nga pagpatay. Gipusil sa wala hiilhing mga lalaki si Larry Villegas, lider sa Piston-General Santos ug kampanyador sa Bayan Muna niadtong Marso 13. Gisulod sa mga kriminal ang iyang balay sa Barangay Buayan, General Santos City. Una na siyang gi-red-tag sa NTF-ELCAC.

Samtang, giharang ug gitionan og kalibre .45 pistola sa wala nailhang kalalakin-an si Amalia Alcantara, lider-kabus sa Pook Malinis, Barangay UP Campus, Quezon City niadtong Marso 12. Napakyas kini dihang hinanaling miresponde ang mga residente sa lugar.

Iligal nga pagpangaresto ug detensyon. Sa Bukidnon, lima ka sibilyan ang iligal nga giaresto sa Sityo Kilap-agan, Barangay Can-ayan, Malaybalay City niadtong Marso 3, samtang nangtroso para sa ilang mga balay dihang naabtan sila sa 1st Scout Ranger Battalion. Ginortyur sila, gitamnan og tag-as nga kalibreng pusil, eksplusibo ug laptop, ug gipagawas nga mga myembro sa Bagong Hukbong Bayan.

Siyam ka mag-uuma, walo ang Lumad, ang gidetine sugod niadtong unang semana sa Marso sa Barangay White Culaman, Kitaotao, Bukidnon sa mga sundalo sa 72nd IB sa usa ka lokal nga klinik. Gipugos silang “mosurender” isip myembro sa BHB aron “i-clear” ang ilang mga pangalan ug karon iligal nga gipriso sa mga sundalo.

Sa Cavite, 10 ka boluntir sa kampanyang Makabayan for Leni-Kiko ang giaresto niadtong Marso 10 sa Sityo Silangan ug Talaba 7, Bacoor. Sa takuban sa “gyera kontra-droga” giatake sa yunit sa PNP-Bacoor ang komunidad. Tulo usab ang samaron sa pag-atake nga mao silang Charlie Aquino, Richard Felipe ug Johnmelda Lucernas. Gikulata usab si Joel Salabanya, bise-presidente sa Anakpawis Partylist-Cavite ug gipabuthan ang iyang asawa.

Iligal usab nga gidetine sa PNP-Silang, Cavite si Jonathan Mercado, tigpamaba sa Teatro Kabataan Mula sa Nayon ug duha pa niyang kauban. Gibuhian ra siya human ang duha ka adlaw nga pagkapriso. Giaresto ang mga progresibo pipila ka adlaw human gi-red-tag ni Sen. Panfilo Lacson ug Cong. Crispin Remulla ang mga misalmot sa rali sa Leni-Kiko tandem sa Cavite.

Giaresto si Carlo Reduta, organisador sa grupong Coco Levy Funds Ibalik sa Amin-Quezon niadtong Marso 18 sa gabii sa Barangay Cawayan, Gumaca.

Pagpamomba. Niadtong Pebrero 20, dili moubos sa walo ka bomba ang gihulog sa AFP sa lima ka umahan sa Barangay Deit de Turag, Silvino Lobos, Northern Samar. Pagkaugma giistraping sa mga helikopter niini ang mga umahan. Naguba ang usa ka payag sa umahan ug kalubihan. Usa ka umahan usab ang naguba human gitugpahan sa helikopter.