Dala ang mga panawagan alang sa makabuhi nga suhulan, ug kasiguruhan, benepisyo ug katungod sa trabaho, nagmartsa ang minilyong mamumuo sa lain-laing bahin sa kalibutan aron dumdumon ang Adlaw sa Pamuo niadtong Mayo 1.

Alang sa mga mamumuong Pilipino, kinahanglan nang ipatuman ang ₱750 nasudnong minimum nga inadlawan ilabina atubangan sa pagsaka sa presyo sa mga palaliton ug serbisyo. Panawagan usab nila nga tapuson na ang kontraktwalisasyon, ug igong trabaho.

Nahimong sentro sa mga panagtapok ang Araneta Coliseum sa Quezon City kung asa mokabat sa halos 16,000 ang mga mitambong sa pagpanguna sa Kilusang Mayo Uno (KMU) ug Bagong Alyansang Makabayan. Gisugdan sa mga raliyista ang pagdumdum sa usa ka programa gawas sa koliseyum kung asa namulong ang ilang mga kandidato sa pagkasenador nga silang Elmer Labog ug Neri Colmenares.

Matud sa KMU, dakung bahin ang ginaatubang sa katawhang Pilipino karong tuiga: ang gipagrabeng pagpahimulos ug pagpangdaugdaug sa hulga sa paghibalik sa mga Marcos ug pagkapyot sa mga Duterte sa poder. Pipila ka adlaw ayha niini, pormal nga giendorso sa grupo ang kandidatura nilang Vice President Leni Robredo sa pagka-presidente ug ni Sen. Kiko Pangilinan sa pagkabise-presidente. Nahimong nag-unang dinapit ang duha sa aktibidad. Kahinumduman nga sa Araneta Coliseum usab gilunsad ang kongreso sa pagtukod sa KMU niadtong Mayo 1, 1980 ilalum sa diktaduryang US-Marcos.

Kadungan niini, nagmartsa sa kadalanan ang mga mamumuo sa Baguio City, Legazpi City, Naga City. Sa Calamba, Laguna, nagtipon ang lain-laing grupo aron ipanawagan nga ihunong na ang pagpamig-ot sa mga mamumuo sa rehiyon.

Naglunsad usab og mga protesta ug programa kauban ang mga tigsuporta sa kandidatora sa Leni-Kiko tandem sa Pasig City. Gipangulohan sa mga nasudnon-demokratikong pwersa ang mga protesta sa Pampanga, Rizal, Cavite ug Aklan, ingonman sa mga syudad sa Roxas, Iloilo, Bacolod, Cebu ug Davao. Nagprotesta usab ang mga Pilipino sa Australia.

Sa gawas sa nasud, dili moubos sa 700,000 ang nagmartsa sa Havana, Cuba aron pasidunggan ang mga mamumuong Cubano ug labaw pang pakusgon ang pagpanalipud sa soberanya sa nasud batok sa agresyon ug interbensyon sa imperyalistang US.

Sa South Korea, gipasiugdahan sa Korean Confederation of Trade Unions ang pagdumdum sa Mayo Uno. Panawagan nila: Katungod sa pamuo nga walay diskriminasyon, disenteng trabaho alang sa tanan ug pagsalikway sa dili pagkaangay-angay.

Gikundena usab sa Centre of India Trade Unions ang pagpaypay sa rehimeng Modi sa pagpamihig sa han-ay sa mga mamumuo. Gipanawagan usab nilang protektahan ang panaghiusa sa mga mamumuo.

Sa Thailand, hiniusang nagmartsa ang mga mamumuong Thai ug Burmese sa distrito sa Siam aron ipanawagan ang umento sa suhulan.

Gatusan ang nagtapok sa New York, aron batukan ang mga kontra-imigranteng palisiya sa US. Kauban sa protesta ang mga bag-ong tukod nga unyon sa Starbucks ug Walmart. Aduna usay mga protesta sa Chicago, Los Angeles, San Francisco, Boston, Washington D.C. ug uban pang bahin sa US.

Gatusan ka libong mamumuo usab ang nagmartsa sa France aron hagiton ang presidente sa nasud nga si Emmanuel Macron. Usa ka semana pa lang ang milabay human mapili isip presidente si Macron sa ikaduhang higayon.

Nagpadayon usab sa ilang panawagan alang sa dugang suhulan ang protesta sa mga mamumuo sa Turkey. Niadto pang miaging tuig gisugdan sa mga unyon ang negosasyon aron patas-an ang suhulan karong tuiga.

Sa Sri Lanka, nagpadayon ang Occupy Galle Face, usa ka kalihukan nga gisugdan niadtong Abril 9 sa tinguhang palagputon ang presidente sa nasud nga si Gotabaya Rajapakasa.

Aduna usay mga protesta sa Ecuador, Portugal, Germany, Belgium, Ireland, lain-laing bahin sa United Kingdom, Cambodia, Iran, Russia, Dominican Republic, Panama, Pakistan, Chile, Spain ug uban pang nasud.

Sa Bolivia, magkadungan nga gianunsyo sa gubyerno ug mga unyon ang umento sa nasudnong minimum nga suhulan alang sa tanang mga mamumuo sa nasud.