Ika-38 Cordillera Day sa Baguio City. Sa temang “Iabante ang bag-ong pulitika, maghiusa alang sa yuta ug kinabuhi!” gidumdum sa katawhan sa Cordillera ang ika-38 ka tuig sa selebrasyon sa Cordillera Day gikan Abril 24 hangtud Mayo 3. Sa ulahing adlaw sa aktibidad, nagtapok ang mga aktibista ug tigsuporta niini sa University of Cordillera sa Baguio City. Kabahin sa ilang pagdumdum ang saad nga pakyason ang pagsulay sa mga Marcos nga mobalik sa Malacañang ug sa mga Duterte nga magpabilin sa poder.

Alay Lakad kontra mina sa Cagayan. Kapin 1,000 mangingisda ug residente sa Aparri, Cagayan ang nagpahigayon og “Alay Lakad” kontra mina sa black sand sa prubinsya niadtong Abril 22. Matud nila ang operasyon sa mina sa lugar usa ka dakung hulga sa kalasangan ug ilang panginabuhian. Misalmot sa aktibidad ang mga residente gikan sa lungsod sa Aparri, Gattaran, Ballesteros, Buguey, Gonzaga ug Sta. Ana. Ginapagawas sa lokal nga gubyerno nga river dredging lang ang gihimo apan ang tinuod nagmina kini og black sand.

Kalampagan sa Kamaynilaan. Gilunsad sa mga demokratikong organisasyon niadtong Abril 29 ang mga noise barrage sa lain-laing bahin sa Metro Manila aron ipalanog ang panawagan sa mga mamumuo ug batok sa posibleng pagpanikas sa umalabot nga eleksyon. Adunay kalampagan sa Tondo ug Taft Avenue sa Maynila, Maysapang, Taguig; Monumento, South Caloocan, Commonwealth Avenue ug Welcome Rotonda, Quezon City.

Padyak alang sa kinaiyahan. Kapin 300 siklista ang mipadyak niadtong Abril 24 aron iasdang ang adyendang maki-kinaiyahan taliwala sa eleksyon. Ang aktibidad naatol sa pagdumdum sa Earth Day 2022 sa tibuok kalibutan. Gikan Bonifacio Shrine sa Maynila mipadyak ang mga siklista padulong sa Bantayog ng mga Bayani sa Quezon City. Adunay susamang aktibidad sa Davao City.