Sa pangkalibutang adlaw sa Gawasnong Pagpamahayag niadtong Mayo 3, nagsaad ang mga midyang Pilipino nga panalipdan ang gawasnong pagpamahayag sa nasud ilabina panahon sa eleksyon. Kini atubangan sa ilang kabalaka kalabot sa mga atake sa mga myembro sa midya gikan sa kampo sa Marcos-Duterte tandem sa panahon sa kampanya.

Atubangan sa walay hunong nga pagsulayng kwestyunon ang ilang kredibilidad, ug mga pagpanghulga ug harasment nga sagad kasunod sa mga kritikal nga pagbalita, nagsaad silang mahimong mas determinado nga panalipdan ang demokrasya ug pakusgon ang diwa sa pagtinabangay ug panaghiusa. Matud nila, ipadayon nila ang mga koalisyong natukod, sama sa fact-checking ug batok sa dis-impormasyon ug mga alyansa sa pagtinabangay ug suporta.

Samtang, gidumdum sa mga midya ang ikaduhang tuig sa pagtangtang sa prangkisa sa ABS-CBN niadtong Mayo 5.