Gatusan ka pamilya sa Maguindanao, Lanao ug Ifugao, mibakwit tungod sa pagpamomba ug militarisasyon

,
Kini nga artikulo adunay hubad sa PilipinoEnglishHiligaynon

Mibakwit ang gatusan ka pamilya sa mga lungsod sa Maguindanao, Lanao del Sur ug Ifugao human ang serye sa pagpamomba ug militarisasyon sa Armed Forces of the Philippines (AFP) sa ilang mga komunidad niadtong Mayo 23.
Kapin 600 ka pamilya sa lungsod sa Datu Salibo, Maguindanao ang napugos nga mobakwit human sa pagpamomba sa AFP sa Barangay Ganta. Gipagawas sa mga sundalo nga target sa maong pagpamomba ang usa ka “grupo sa terorista.”

Matud sa mga residente sa Datu Salibo, nakurat sila dihang kalit nga milanog ang kusog nga mga pagbusikad gikan sa duha ka FA-50 fighter jet ug duha ka MG-520 attack helicopter sa may alas-7 sa buntag. Nagpabuto usab og mga 105 mm Howitzer nga nakapwesto sa usa ka kampo sa militar.
Nalisang ang mga residente tungod kay nahitabo ang pagpamomba samtang ginadumdum nila ang anibersaryo sa pagpulbos sa Marawi City niadtong 2017.

Sa Ifugao, 122 ka pamilya o kapin 500 katawo ang mibakwit sa Barangay Namal, Asipulo tungod sa malukpanong operasyong militar sa 54th IB human ang engkwentro kuno sa yunit niini sa Bagong Hukbong Bayan.

Gipugngan sa lokal nga gubyerno ang mga residente nga mobalik sa ilang komunidad nga grabeng nakaapekto sa ilang panginabuhian.

Gikanyon sa AFP sa 21 ka hugna ang bukirong bahin sa Maguing, Lanao del Sur niadtong Mayo 21 gikan alas-2 sa kaadlawon hangtud hapon. Subli nilang gikanyon ang maong lugar niadtong Mayo 28 sa hapon kung asa pito ka bala sa kanyon ang ilang gipabusikad. Labing naapektuhan sa mga pagpamomba ang panginabuhian sa masang Moro sa lugar.
Nang-istraping usab ang AFP gamit ang usa ka Black Hawk nga helikopter sa bukirong bahin sa Jabonga, Agusan del Norte niadtong Mayo 19. Nagbunga og kahadlok sa mga sibilyan sa komunidad ang maong insidente.

Niadtong Mayo 26, gibungkag sa mga nag-operasyong sundalo sa 62nd IB ang maisan ug gikawat ang manok sa mga mag-uuma sa Barangay Quintin Remo, Moises Padilla, Negros Occidental. Gikan pa niadtong Mayo 12 militarisado na ang maong lungsod ug kasikbit niining mga lungsod sa Isabela ug La Castellana sa Negros Occidental ug Guihulngan City, Vallehermoso ug Canlaon City sa Negros Oriental.

Pag-aresto. Gidakop sa mga pulis silang Percival Dellomas ug Darwin Guelas, mga lider mag-uuma sa Sorsogon, sa usa ka tsekpoynt sa mga prubinsya sa Sorsogon ug Albay niadtong Mayo 28. Si Dellomas usa ka lider sa Samahang Magbubukid sa Sorsogon samtang si Guelas myembro sa rehiyunal nga konseho sa Kilusang Magbubukid ng Pilipinas–Bikol. Gikasuhan si Dellomas og paglapas sa Anti-Terrorism Act samtang si Guelas gipasakahan og gama-gamang kasong pagpatay.

Niadtong Hunyo 2, gidakop sa Barangay Pinontingan, Gubat, Sorsogon ug gipasakahan sa gama-gamang kasong pagpatay si Jhen Estiller, myembro sa Amihan-Bicol.

Gatusan ka pamilya sa Maguindanao, Lanao ug Ifugao, mibakwit tungod sa pagpamomba ug militarisasyon