Apat ka armadong opensiba ang ginlunsar sang Bagong Hukbong Bayan (BHB)-Sultan Kudarat halin Hunyo 15 tubtob Hunyo 29 batuk sa nagaoperasyon nga mga yunit sang pulis kag militar.

Ginpalukpan sang bomba kag ginpaarakan sang BHB ang kontra-insurhensya nga yunit sang Philippine National Police-Special Action Force (PNP-SAF) nga nagaoperasyon sa Sityo Meleb, Barangay Butril, Palimbang sang Hunyo 29. Lima ka pulis ang napatay samtang duha ang napilasan.

Sa pareho nga banwa, ginpalukpan sang BHB ang pwersa sang 7th IB sa Sityo Fliko, Barangay Balwan sang Hunyo 15 sang hapon. Ginsundan ini sang isa pa ka armadong aksyon sang mga Pulang hangaway sang Hunyo 18 batuk sa 37th IB sa Barangay Molon. Duha ka adlaw pagkatapos sini, nag-atake liwat ang BHB batuk sa 38th IB sa pareho nga barangay. Indi magnubo sa lima ka suldado ang napatay. Ginapat-ud pa kon pila ang napilasan.

Suno sa yunit sang BHB, ang mga suldado kabahin sang halos isa ka libo nga tropa nga nagaoperasyon sa lugar. Lakip sa mga nagaoperasyon nga yunit ang 38th IB, ang batalyon nga nagadumala sa mga CAFGU kag direkta nga nagaserbisyo sa DM Consunji Inc kag nagagwardya sa mga operasyon sa pagtroso kag iban pa.

Ginreport man sang yunit sang BHB ang dugang nga nagalab-ot sa 30 kaswalti (wala pa maisip kon pila ang napatay) sa kubay sang mga suldado sa mis-engkwentro sa tunga sang ila mga yunit sang Hunyo 18. Ginakumpirma pa sang BHB ang pauna nga report angut sa posible nga paghulog sang bomba sang AFP sa kaugalingon nila nga pwersa.

Sa Camarines Sur, ginpalukpan sang bomba sang mga Pulang hangaway sang BHB ang nagaoperasyon nga yunit sang 9th ID sa Sityo Balaybayon, Barangay Tanauan, Presentacion sang Hunyo 15. Tatlo ang napatay samtang walo ang napilasan sa nagaoperasyon nga mga suldado.