Ginsug-alaw sang mga protesta sa nagkalainlain nga lugar ang inagurasyon ni Ferdinand Marcos Jr bilang pangulo. Sa Metro Manila, nagtipon ang mga progresibong grupo sa Plaza Miranda sa Quiapo kon sa diin ginpahayag nila ang ila pagsikway sa iya rehimen, pagpangtiko sa kasaysayan kag para sa hustisya sa tuman kadamo nga biktima sang layi militar sang iya amay. Dala man nila ang mga isyu sang pumuluyo pareho sang dugang nga sweldo, kag pagpanubo sa presyo sang balaklon kag langis.

May kadungan nga pagtilipon ang mga kadugo sang biktima sang layi militar kag mga beterano nga aktibista sa Bantayog ng mga Bayani sa Quezon City kon sa diin namumpa sila nga pagdayunon ang pagbato sa kabutigan sang mga Marcos kag para sa interes sang banwa.

Sa Bicol, ginpangunahan sang Anakbayan-Naga ang martsa halin sa Panganiban Drive sa Naga City padulong sa Plaza Oragon agud sikwayon si Marcos. Nagtambong ang mga aktibista halin sa nagkalainlain nga distrito sang Camarines Sur.

May mga programa man sa Cebu, Negros kag Panay kon sa diin ginpahayag sang nagkalainlain nga organisasyon ang ila pagkangil-ad sa rehimeng Marcos II.

Sa luwas sang pungsod, ginpangunahan sang Never Forget Contingent ang ginatos nga nagprotesta sa New York Times Square, New York City. Nagtipon man ang 150 migranteng Pilipino sa California para magpahayag man sang ila pagsikway sa bag-o nga rehimen.