Gikasilagan sa mga lumulupyo sa Sityo Lakbangan, Minalwang, Claveria, Misamis Oriental ang usa ka yunit sa 26th IB nga gisentrohan ni Tata Hulibayan tungod sa gihimo niining pagpangdaot sa mga balay niadtong Nobyembre 2. Dili moubos sa usa ka semana ang pagpundo ni Hulibayan sa sityo human sa gipahigayon niining operasyon sa kabukiran.

Oktobre 28 namahada sa kasikbit nga sityo ang mga lumulupyo alang sa umabotay nga barangay/SK eleksyon ug kalag-kalag, uban ang ilang mga pamilya. Unang semana sa Nobyembre pipila na kanila ang namalik. Naabtan nalang nila ang ilang mga balay ug duha ka klasrom nga naguba, napuno sa lapok ug nagkatag nga mga gamit. Nasayran usab nila nga gikawat ang ilang mga manok, tulo ka shotgun, isa ka debomba lakip ang mga bala ug laptop sa maistro, ug gihubsan ang fishpond.

Taliwala sa kasuko nga ilang gibati pugos usa nilang gibyaan ang sityo tungod sa kahadlok nga basin mobalik si Hulibayan. Nadilatar ang ilang pag-uma ug pag eskwela sa ilang mga anak. Kapin bulan na silang nagpayag kilid sa Ojot River.

Dili lang kini ang kalapasan ni Hulibayan sa maong sityo. Ginahulga usab niyang pangdakpon ang mga lumulupyo nga iyang giinitan ug ipa “no mans land” ug ipa-masaker ang sityo tungod kuno mga suporter sa NPA. Gani pipila na ka sibilyan ang pugos nga gipasurender.

Ang sityo Lakbangan hulga usab sa pagpangilog sa yutang kabilin. Tungod kay target kini nga sudlan og proyektong farm-to-market road. Kini nga kalsada motagos gikan sa Ojot River paingon sa Pusilaw River ug mosumpay sa kalsada nga kamulo ginahimo sa sityo Mahagwa, Hagpa, Impasug-ong, Bukidnon. Sayod ang lumulupyo nga kini nga proyekto dili para sa ilang kaayohan tungod kay sigurado sila nga kini moalagad sa pagpasulod sa mina ug plantasyon.

Kanhi nang nabulabog ang pamuyo sa mga residente sa Sityo Lakbangan. Kaniadtong Nobyembre 2014 ug Hunyo 2018, pugos na silang nakabakwit tungod na usab sa subsob nga operasyong militar sa AFP kung asa nikaylap na ang mga pagpanglapas sa tawhanong katungod. Nabiyaan nila sa daan nilang baryo ang ilang mga balay ug pananom. Niining tuiga lamang, nikabat na sa lima ka residente ang iligal nga gidakop ug gipagawas nga kintahay membro sa NPA nga “nagsurender”.

Matod ni Roy “Mobalik gyud mi sa sityo kay naa didto among panginabuhian. Maghimo mig pamaagi nga dili na makabalik si Hulibayan sa sityo. Amo gyud panalipdan ang sityo Lakbangan.”