Gipatay sa elemento sa 26th IB ug paramilitar nga silang Ambin, Ombin, Kumos, Punso, Small ug Lalo si Maadagi Tumanan ug iyang asawa niadtong Oktobre 2 sa sityo Dokdokaan, Eurika, Claveria, Misamis Oriental.

Nangani sa humayan kilid sa Ojot River si Maadagi, iyang asawa ug bayaw nga babaye ug kalit silang gipamusil. Namatay gilayon si Maadagi, iyang asawa gidala sa lasang, gilugos ayha gipatay. Samtang ang iyang bayaw nga babaye nakadagan ug hangtod karon wala pa makauli. Gi-piktyuran ang patayng lawas ni Madaagi tapad ang usa ka armas. Gi post sa social media ang piktyur ug gibutangan og “nisukol hinungdan nga gipusil”.

Sa Kulaman, Malaybalay City, niadtong Hulyo 6 gipatay sa wala mailhi nga mga tawo si Jimboy Gilusan.

Pag-aresto. Duha ka sibilyan ang giaresto sa 58th IB sa Bal-ason, Gingoog City, Misamis Oriental niadtong Nobyembre 22 sa alas 10 sa buntag. Kini silang Janrey Doliyen ug Jorim Pinampay parihong lumulupyo sa Sityo Lakbangan, Minalwang, Claveria, Misamis Oriental.

Nibahada si Doliyen ug Pinampay para magpaayo sa motor ug magpalit og ispat. Samtang nagpaayo, kalit nga may 4 ka tawo nga may mugbo nga armas ang niduol sa ila. Gidala si Pinampay sa sementeryo sunod si Doliyen. Gibulag silang duha ug giutingkay ilang mga gamit lakip ang ubox sa motor. Dunay gipakita nga mga picture sa NPA kuno ug pabalik-balik silang gipangutana kung duna ba silay nailhan. Giingnan sila nga illegal ilang trabaho ug dunay papel nga papirmahan sa ila apan wala sila nipirma. Alas 3 sa hapon na sila gibuhian.

Sa KM55, San Luiz, Agusan del Sur gidakop sa mga pulis silang Roy Pabiana, Malinumbo Balansag ug Victor Lalinan niadtong ikatulong semana sa Nobyembre. Kining tulo kasamtangan napriso sa Talacogon Police Station.

Samtang niadtong Oktobre 23, giaresto ug gipasakaan og kasong Murder si Charlyn Pacquio, kanhing myembro sa Anakbayan. Naa siya karon nadetine sa CIDG-Malaybalay kuyog iyang puya nga anak.

Pagpamusil. Sa sityo Takokon, Indalasa, Malaybalay City tulo ka lumad ang kalit nga gipamusil sa 88th IB niadtong Nobyembre 17 sa alas 9 sa buntag. Manguha unta og mamaon ug Durian ang tulo sa dihang nasugatan nila ang sundalo nga nag-operasyon.

Pagpanghasi. Niadtong Nobyembre 6, 2023 sa sityo Ulayanon, Kalabugao, Impasug-ong, gihikap ang mga bukton ni Lina Almahan sa mga sundalo sa 16th IB. Alas 12 sa udto nangamote si Almahan uban sa iyang duha ka anak sa dihang may sundalo ang niduol sa iya. Gipangutana siya kung asa iyang bana ug giingnan nga para sa NPA iyang uma. Gipangtumban iyang tanom ug gikuha iyang solar panel lakip ang battery sa VHF.