Naglunsad ang Katipunan ng mga Magsasaka ng Timog Kataglugan (KASAMA-TK) ng iba’t ibang porma ng pagkilos upang gunitain ang Buwan ng mga Magbubukid ngayong Oktubre.

Oktubre 18. Matagumpay na inilunsad ang forum sa LICEO, simbahan ng San Pablo, Laguna katuwang ang San Pablo Ayaw sa Korap (SAPAK) na may temang “Mamamayan Magkaisa para sa Lupa at Buhay, Labanan ang Korapsyon at Katiwalian”. Dinaluhan ito ng 60 katao mula sa mga magsasaka ng Pandin, San Pablo; Laguna; Tartaria, Silang, Cavite; at mga katutubong Iraya—Mangyan mula sa Mindoro. Dumalo rin ang mga manggagawa ng PAMANTIK-KMU, mga kabataan ng UPLB at Bagong Alyansang Makabayan (BAYAN). Pagkatapos ng forum ay nagkaroon ng salubungan at protesta sa Carabao Park sa UPLB. Nagmartsa ang delegasyon patungong Student Union Building kung saan inilunsad ang gabi ng pagtatanghal para sa mga magsasaka at katutubo sa temang “Himig ng Lupa, Pintig ng Bayan”. Nagsagawa ng talakayan dito ang 103 na katao.

Oktubre 19. Nagtipon ang nasa 60 katao sa inilunsad na Bagsakan sa Baclaran sa umaga. Sa misa ng hapon, nagbahaginan ang mga katutubong Dumagat, mga magsasaka ng Rizal at grupo ng Iraya Mangyan hinggil sa kani-kanilang kalagayan.

Sa parehong araw, ikinasa ang asembliya ng KASAMA-TK sa UP College of Social Work and Community Development. Dinaluhan ito ng 150 delegadong magsasaka mula sa Cavite, Laguna, Batangas, Rizal, Quezon at Mindoro at iba pang sektor. Selyo ng tagumpay ng samahan sa araw na ito ang paghahalal sa bagong panrehiyunal na konseho ng KASAMA-TK.

Oktubre 20. Nag-caravan ang 309 magbubukid ng TK upang singilin ang mga reaksyunaryong ahensya. Sa harap ng Department of National Defense, nagprotesta sila laban sa walang tigil na militarisasyon at pambobomba sa komunidad ng mga katutubo at magsasaka sa kanayunan. Kinundena nila ang pagsasampa ng mga gawa-gawang kaso, red-tagging at pang-aaresto sa mga lider aktibista at organisador sa TK.

Siningil ang Department of Agriculture sa bagsak-presyo ng palay, kawalan ng kumpensyasyon sa mga magsasaka at patuloy na mababang pasahod sa mga mangagawang bukid.

Sa opisina ng Department of Environment and Natural Resources, ipinaabot nila ang kawalang aksyon nito sa mga pagkasira ng kalikasan sa TK. Itinambol nila ang isyu tungkol sa reklamasyon, dredging at Land Use Conversion sa Cavite; pangwawasak sa Laguna Lake dahil sa Laguna Lakeshore Road Network Project at pagtatayo ng Ahunan at Pakil Dam; pananalasa ng malalaking korporasyong mina at quarry sa bundok ng Sierra Madre at Mindoro. Tinuligsa rin nila ang mga green projects na proyektong Solar Farms sa Batangas, Wind Mill Project sa Bundok Banahaw, at iba pa.

Kinundena ang kawalang aksyon ng Department of Social Welfare and Development sa mga nagdaang sakuna. Tampok ang kawalan ng kompensasyon at suporta sa mga magsasaka ng Batangas na biktima ng Bagyong Kristine isang taon na ang nakalipas. Humihingi ng hustisya ang mga magsasaka para sa dalawang evacuees sa Bay, Laguna na namatay kapabayaan sa sanitasyon sa gitna ng tuluy-tuloy na pagbaha sa lugar. Tinuligsa ang korapsyon sa kaban ng bayan habang nagdurusa ang mamamayan.

Nagkampuhan naman ang mga magsasaka ng TK kasama ang mga magsasaka ng Central Luzon at Negros sa Department of Agrarian Reform (DAR). Naglunsad sila ng programa sa labas ng ahensya habang may dayalogo sa loob. Muling binigo ng DAR ang mga magsasaka ng Hacienda Roxas sa Batangas, Malatabako at Guinobatan sa Mindoro, Sumilang sa Rizal at Tartaria at Lupang Ramos sa Cavite dahil hindi ito nagbigay ng kongkretong solusyon sa kanilang hinaing. Inilahad ng mga magbubukid ang kanilang galit at pagkadismaya sa ahensya. Kinagabihan, naglunsad ng Cultural Night ang mga magsasaka kasama ang mga guro.

Oktubre 21. Dinaluhan ang protesta sa Araw ng Magbubukid ng 365 delegasyon mula sa TK. Pinangunahan ng KASAMA-TK ang maiksing programa sa harap ng DAR. Sinunog dito ang effigy na imahe ng rehimeng US-Marcos II bilang pagkundena sa sistemang padrino at korapsyon ng burukrata kapitalismo na nagpatindi sa pang-aapi at pagsasamantala sa mga magsasaka ng TK. Tumungo ang delegasyon sa Liwasang Bonifacio kung saan nagtipon ang mga magbubukid at iba pang sektor mula sa iba’t ibang rehiyon upang magdaos ng programa bago tumungo sa Mendiola para sa pagtatapos ng protesta sa Buwan ng Magbubukid.

Tumungo ang buong delegasyon sa Mendiola bilang pagwawakas ng protesta. Sigaw ng mga magbubukid ng TK, “Tuluy-tuloy ang laban, panagutin ang mga magnanakaw! Ikulong ang mga kurakot!”