Kontrolado ng imperyalismong US ang kultura ng Pilipinas mula nang sinakop ng una ang huli at hanggang sa igawad ang huwad na kalayaan at itatag ang papet na republika ng bansa. Ipinalaganap ng US ang imperyalistang kultura upang bigyang katwiran ang pagkubabaw at pagsasamantala sa bayan kasabay ng pagpatay sa diwang makabayan at anti-imperyalista ng mga Pilipino.

Sa sistema ng kultura at edukasyon, mapagpasya ang impluwensya ng mga ahensya ng gobyerno ng US tulad ng USAID, US Educational Board, Peace Corps at mga pundasyong tulad ng Asia Foundation, Rockefeller Foundation at Ford Foundation. Ginagamit ang mga programa sa palitan ng tauhan sa iba’t ibang sektor at ang mga pondong ibinibigay para magbiyahe, mag-aral, at manaliksik upang dakilain ang “buhay Amerikano” at palaganapin ang mga ideyang anti-nasyunal at anti-demokratiko.

Ang mga pondo sa edukasyon ay nakalaan sa pagpapahigpit ng kontrol ng imperyalismong US sa sistema ng edukasyon sa Pilipinas. Sa pagpapautang sa Pilipinas, ginagamit ng imperyalismong US ang mga kasunduan sa World Bank para panatilihin ang mga maka-imperyalistang patakaran sa edukasyon sa pagpapataw ng mga kurikulum at kurso at hanggang sa nilalaman ng textbooks.

Ipinatupad ang mga patakarang K-12 program ng rehimeng US-Aquino II na nagdagdag ng dalawang taon ng senior high school. Habang pandemya sa ilalim ng rehimeng US-Duterte, sinimulan naman ang blended learning na may modular learning at online classes na dagdag pahirap sa pagkatuto ng mga estudyante. Ngayon naman sa panahon ni Marcos ay ipinatupad ang Matatag curriculum na nagtanggal sa mahahalagang pangyayari sa kasaysayan ng Pilipinas at higit na nagpalala sa historical revisionism. Lahat ng mga iskemang ito ay nakaayon sa pagkakait sa kabataan ng dekalidad na edukasyon at patayin ang makabayang kulturang Pilipino.

Edukasyong kolonyal, komersyal at mapanupil

Isa ang edukasyon sa mga pangunahing kasangkapan ng imperyalismong US sa pagkontrol sa isip ng mamamayan laluna ng kabataan. Ipinataw nito ang kolonyal, komersyal at mapanupil na edukasyon na malaon nang nananalasa sa bansa.

Pinagsisilbi ang edukasyon upang ipalaganap ang ideyang palasamba at palaasa sa US. Nakaayon ang sistema ng edukasyon sa neoliberal na patakaran ng liberalisasyon, deregulasyon, pribatisasyon at denasyunalisasyon.

Nilikha nito ang pamantayan para tangkilikin ang mga produktong imperyalista na iniimport sa bansa kontra sa mga lokal na produkto. Hinuhubog ang isip ng mga kabataan na tanggapin na lamang ang kasalukuyang kalagayan bilang murang pinagmumulan ng lakas-paggawa sa loob at labas ng bansa, gayundin ang mga ipinapataw na mga tagibang na patakarang pumapabor sa imperyalismong US. Patuloy na inihihiwalay ang kabataan sa lipunang ginagalawan niya sa pagtapyas ng mahahalagang asignatura kagaya ng kasaysayan ng rebolusyonaryong pakikibaka at yaong mga praktikal na araling makakatulong sa pagpapaunlad ng bayan.

Sinusupil ng sistema ng edukasyon sa bansa ang pagyabong ng progresibo at rebolusyonaryong kaisipan. Dinadahas ng estado ang mga kabataan at ipinagkakait ang kalayaan sa pamamahayag at kalayaan sa akademiko. Minimilitarisa ang mga eskwelahan kung saan kinakampuhan mula mababang paaralan hanggang kolehiyo’t mga pamantasan at nagsasagawa ng mga papulong at forum sa mga estudyante at guro para sa red-tagging, paniniktik at intimidasyon.

Kultura ng indibidwalismong petiburges

Noong sakupin ang Pilipinas, unang ipinalaganap sa mga paaralan ang pilosopiya ng liberal na demokrasya. Para lubusang tunawin ang progresibo’t makabayang kaisipan ng kabataan, ipinalaganap ng imperyalismo ang postmodernismo, positibismo, eksistensyalismo at iba pang kaisipan. Ginagamit ng US ang postmodernismo para suhayan ang anti-komunistang propagandang “ang kapitalismo ang dulo ng kasaysayan” at ipalaganap ang angat-sa-uring pakikibaka para sapawan ang makauring pakikibaka ng mamamayan sa pamumuno ng uring proletaryado.

Pinatitingkad ang indibidwalismong petiburges sa hanay ng mga kabataan. Hinuhulma silang maging makasarili—magpakalunod sa sariling mga palagay, labis na pagmamalaki sa sarili, pangungunsinti-sa-sarili at kaisipang nakaaangat-sa-iba habang binabalewala ang lahat ng nagaganap sa kanilang paligid. Gamit ang internet at iba pang daluyan, isinasalaksak ng imperyalismo ang iba’t ibang anyo ng libangan para ilayo sila sa obhetibong realidad.

Information warfare at “terror-grooming”

Sa gitna ng nilulutong gera ng US sa China, pinauulanan ang isip ng kabataan sa pamamagitan ng “edukasyon” para kumampi at sumalig sa US kontra sa China. Ginagawa ito ng US upang bulag na tanggapin ng mga kabataan ang dumaraming presensyang kampo at pwersang militar ng US sa bansa habang umiigting ang tensyon sa West Philippine Sea. Pilit ipinatatanggap ng US sa buong bayan ang pambubuyo nito sa China at kinukundisyon ang isipan ng mga kabataang Pilipino sa pagputok ng gera anumang oras. Nakabalangkas din ito sa pagrerekluta sa mga kabataan sa mersenaryong kasundaluhan sa tabing ng huwad na patriyotismo.

Ginagamit din ang information warfare upang ipakete bilang demonyo ang rebolusyonaryong kilusan sa mata ng mga kabataan. Pilit ding iniuugnay ang mga progresibo at makabayang organisasyon at aktibista sa rebolusyonaryong kilusan. Imbing pangarap ng imperyalismong US na ilayo ang mga kabataan sa armadong rebolusyon. Ipinipinta nilang marahas ang mga komunista at rebolusyonaryo at pinagtatakpan ang mga paglabag sa karapatang tao ng AFP, PNP at NTF-ELCAC.

Nilalabusaw ang makatarungang paghihimagsik ng kabataan laban sa mapaniil na estado sa pagpapalaganap ng terminong “terror-grooming” laban sa rebolusyonaryong kilusan o ang pagsasanay sa mga bata o kabataang wala pa sa hustong gulang tungong terorismo. Sa kabilang banda, ang tunay na nagpapatupad ng “terror-grooming” ay ang estado sa sapilitang rekrutment sa Reserved Officers Training Course sa kolehiyo. Nagpapatuloy din ang berdugo at mersenaryong tradisyon ng AFP dahil sa pasistang indoktrinasyon nito sa mga rekrut.

Kulturang kontra-agos at rebolusyonaryo

Malaking hamon ngayon sa mga kabataan at mga manggagawang pangkultura ang pagsusulong ng pambansa, siyentipiko at makamasang sining at edukasyon na direktang sumasalungat sa dominanteng kulturang ipinataw ng imperyalismong US sa bansa—kolonyal, burges, pyudal at dekadente.

Ang pagpapalaganap ng edukasyon at kulturang pambansa ay magbibigay-buhay sa diwang makabayan at paghahangad ng ganap na kalayaan mula sa imperyalismo. Dapat din bitbitin ang edukasyon at kulturang may kritikal na pananaw at pamamaraan upang makahulgapos sa pyudal na gawi at kamangmangan. Sinasalamin ng edukasyon at kulturang pangmasa ang mithiin ng lahat ng inaapi at pinagsasamantalahang uri. Dapat ibandila ang kakayahan ng malawak na hanay ng masa, partikular ang mga manggagawa at magsasaka, sa paghubog ng lipunan at paglikha ng kasaysayan.