Bilang paggunita sa unang taon ng Operation Al Aqsa Flood, ang armadong aksyon na inilunsad ng mga grupo ng Palestino laban sa Zionistang Israel, naglabas ng pahayag noong Oktubre 7 si Abu Obaida, tagapagsalita ng Al-Qassam Brigades, ang armadong bisig ng Palestinian Resistance Movement o Hamas.

“Niyanig ng Al Aqsa Flood ang Zionistang kaaway at binago nito ang mukha ng rehiyon,” ayon kay Obaida sa kanyang nakabidyong pahayag. “(B)inigwasan natin ang kaaway sa isang malakas na preemptive na atake bago dumating sa pinal na antas ang plano nitong mayor na atake sa lumalabang mamamayan sa Gaza.”

Noong araw na iyon, inatake ng mga armadong pwersang Palestino ang Gaza Division ng Israel Defense Forces, ang mga garisong militar nito at ang kamuhi-muhing mga settlement o lupang inagaw sa mga Palestino sa paligid ng Gaza.

Aniya, ang desisyon para sa pag-atake ay naabot matapos nalagay sa bingit ng demolisyon ang moske sa sagradong Al Aqsa, at sa harap ng agresibong pagpapalayas ng mga Palestino sa West Bank, laluna sa paligid ng Jerusalem, walang kapantay na pang-aabuso sa mga bilanggong Palestino, paglabag sa lahat ng mga tradisyon at nagpapatuloy na pang-aatake sa Gaza.

Ang operasyong Al Aqsa ay “matatag na ipinagpapatuloy ng mga grupong Palestino, katuwang ang mga bansang Arabo na sumusuporta sa paglabang Palestino. Aniya, ang mga atakeng inilulunsad ng mga lumalabang grupo at brigada sa loob ng Gaza ay nagpapahina sa kakayahan sa seguridad at depensa ng Israel, bumibigwas sa ekonomya nito, at nagpapalayas sa mga Israeli setler na nang-agaw ng lupang Palestino.

Ito ay kahit di pantay ang labanan sa harap ng isang “kriminal na kaaway na walang pagdadalawang-isip na gumawa ng lahat ng klaseng krimen. Aniya, patuloy na pinauunlad ng mga brigada at armadong grupo ang kanilang mga taktika, pormasyong pangkombat, at mga pamamaraan.

“Desisyon at pinipili namin na ipagpatuloy ang kumprontasyon sa matagal, masakit at mapaminsalang gerang atrisyon hanggang patuloy ang agresyon ng kaaway,” aniya. Hindi titigil ang kanilang paglaban sa kabila ng mga asasinasyon ng kanilang mga lider, kabilang ang kanilang alyadong si Sayyed Hassan Nasrallah ng Hezbollah.

“Kailan pa napatigil ng mga asasinasyon ang mga kilusang mapaglaya at paglaban?” aniya. Ipinapangako niyang pagsisisihan ng Israel ang mga krimeng ito.

Gayundin, sinabi niyang “lumilipad sa okupadong kahanginan ng Palestine ang mga drone at misayl ng Lebanon, Yemen at Iraq at tumatama sa mahahalagang lugar at target ng kaaway.”

Habang lumalawak ang pakikiisa ng mga mamamayan, laluna ng mga mamamayang Arabo sa Palestine, nakikilala ang Zionistang estado bilang brutal, mamamatay-tao at kriminal na entidad, itinatakwil ng lahat ng mga bansa at mga malayang mamamayan ng buong mundo, aniya.

“Ang entidad na ito ay nakaasa lamang sa hukbong panghimpapawid na itinayo at kontrolado ng US, at napapanatili lamang dulot ng pagsuhay ng mga administrasyong Amerikano, na mapuputol at mapuputol sa katagalan,” aniya. “Nakaasa din ito sa kolonyal na suporta mula sa Europe na itinakwil na kahit ng sarili nilang mamamayan…”

Hinggil sa mga bihag na hawak ng al Qassam, sinabi ni Obaida na noon pa sanang nakaraang taon sila napalaya at napauwi sa kanilang mga pamilya kung hindi dahil sa pagmamatigas ng gubyernong Netanyahu. Aniya, papahirap ang kundisyon ng mga bihag habang tumatagal sila sa Gaza at tumitindi ang mga atake ng Israel dito.

“Sa loob ng isang taon, bigo ang kaaway na kamtin ang mga layunin nito sa Gaza, kaya tinatangka nito ngayon na palawakin ang krisis nito sa pamamagitan ng pag-atake sa Lebanon at sa rehiyon sa pag-asang maibabalik nito ang imahe ng deterrence na nabasag sa (Gaza) Strip mula Oktubre 7,” ayon naman kay Khaled Meshaal, lider ng Hamas at upisyal ng gubyerno sa Gaza.