amingawan san lubnganan ngan diri tinuod nga kamurayawan an gin-uundong han mga peke nga “peace rally” sa Northern Samar nga igintuman sa ika-57 nga anibersaryo san Partido sadton Disyembre 26. Klaro nga an 20th Infantry Battalion an aada sa likod sini, an pareho nga berdugo nga batalyon ng usa kabulan na nga naghihimo sin operasyon kombat sa mga bungto ngan pira katuig na nga naghahadi-hadian sa mga komunidad diin ginhimo an pakaraot nga mga aktibidad.

Pakyas an mga alipures ni Lt. Col. Tim Clavel nga pagawason nga nagbuot la nga pakarauton san mga residente san Bonifacio, Catubig, Bulao ngan San Isidro sa Las Navas, ngan Cagmanaba sa Jipapad an Partido. Lanong ha masa an 20th IB komo nagpatay kan Kap Pening Lebico san Barangay San Miguel, Las Navas san 2019, nangistraping sa duha nga menor de edad sa Barangay Roxas, Catubig san 2022, nambomba sa Barangay San Isidro sini nga 2025, ngan ura-ura kadamo nga iba pa nga pasista nga krimen. Ngani, an berdugo nga batalyon an responsable sa kadam-an (22%) san panalapas sa tawhanon nga katungod sa Eastern Visayas tikang 2018-2025.

Maaram liwat an masa nga ang militar, diri an Partido o BHB, an pwersahay nga nagpapasurender sa mga sibilyan, nagbubungkag sa ira mga asosasyon, ngan nagseserbe nga tagdepensa san mga hakog nga negosyante ngan agaron maytuna nga naniniyupi sa mga kablas nga parag-uma. An AFP usa nga mersenaryo nga hukbo.

Tungod ini kay buksas na an modus san 20th IB. Nalilisang sira nga maghakot san mga residente sa mga “peace rally” tungod kay usa ini sa mga rekisito para mahiapi an usa nga barangay komo “benepisyaryo” sa Support to Barangay Development Program (SBDP) san National Task Force-Elcac. Lanat nira nga padakuon an SBDP nga maiha na nga buksas komo pork barrel san militar ngan putos sin anomaliya tungod kay diri gin-gagastos sin tuhay. Labaw pa, kabalyo san pondo san SBDP an pagpapamingaw sa makatadungan nga pakigbisog san masa para sa ira mga katungod ngan demokratiko nga interes.

Sukwahi sa karuyag pagawason san 20th IB, padayon nga mapaso nga ginsusuportahan san masa an demokratiko nga rebolusyon san katawhan komo taming ngan paglaum kontra sa pasista nga terorismo ngan paniniyupi nga ginsasabrag san militar. Pakyas an ira peke nga “peace rally” nga igsabotahe an selebrasyon san BHB ngan san masa sa anibersaryo san Partido. Diri hira maaram, nahilansar na ha magkalain-lain nga prente gerilya an sikreto nga mga selebrasyon.