Masobra apat ka oras nga gindetini sang 94th Infantry Battalion, Philippine Army (94IB) ang mag-asawa nga si Orillo kag Gamay Carpentero, 22 anyos, upod sa ila bata nga sobra isa ka tuig kag utod ni Gamay nga si Dodong Carpentero, sa Sitio Negros 9, Brgy. Oringaw, Kabankalan City, Negros Occidental sadtong Martes, alas 3 sang hapon, Setyembre 20, 2022.

Nagapanguha sang utanon ang mag-utod nga si Gamay kag Dodong sa ila uma pasado alas 2 sang hapon sang gindakop kag gin-imbestiga sila sang masobra 20 ka tropa sang 94IB nga naka-istasyon sa Sitio Pandan kag Basak, Brgy. Tan-awan sa amo man nga syudad. Gindala ang duha sa simbahan sang katoliko sa amo nga sitio kag didto ginbali-bali sang pamangkot. Sang nalabayan sila sang isa sa ila katupad balay, nagpaninguha tani nga mangayo bulig si Gamay pero gin-uyatan sa mga pasista ang ulo niya kag ginduso sa duta para indi makahambal.

Pila ka minuto ang naglabay sang nag-apas ang iya banahon nga si Orillo dala ang ila bata bangud kay nabalaka na ini nga wala pa sila nakapuli. Nakita sang bana nga ginpalibutan sang army ang iya asawa pero imbes nga makabulig, ginsakay sila kag gindala ang apat sa kampo militar sa Brgy. Camingawan kag didto liwat gin-imbestigar. Ginpapauli sila lapit alas 8 sang gab-i sang wala sang nakuha nga impormasyon ang militar sa amo nga pamilya.

Ginkaakig sa ila himata kag mga katupad balay sa pamilya Carpentero ang natabo sa ila bangud nagpadumdum ini sa ila mga pamilya nga mga biktima man sang pagpangkastigo kag tortyur sa grabe nga militarisasyon panahon sang Martial Law ni Marcos. Dugang diri, ginkaakig man sang pumuluyo bangud mismo sa simbahan pa ginhimo sang mga militar ang kalakasan batok sa mga inosenteng sibilyan.

Ini nga tropa militar masobra tatlo na ka bulan nga nakaistasyon sa mga sitio sa Brgy. Tan-awan kag subong nga bulan nagaamat-amat tukod sa ila nga detachment. Nagakahangawa ang pumuluyo nga magadamo ang kalapasan kag magaduging ang anti-sosyal nga mga aktibidad sa pag-istar sa mga militar sa ila komunidad.

Samtang nagasako si Ltc. Van Donald Almonte sang 94IB sini nga bulan sa iya mga fake news para tabunan ang mga panghitabo nga kalapasan kag militarisasyon bunga sang Martial Law ni Marcos, nagaguwa naman ang matuod nga kolor sang tatak pasistang AFP nga amo mismo ang magpadumdom sang pumuluyo sa ila mapait nga nadangatan sadto sang Martial Law. Wala sang kinalain ang pasista, abusado, kag uhaw sa dugo nga AFP-PNP kag ang NTF-ELCAC sa panahon sang Marcos I tubtub subong nga Marcos II. Ang AFP ang matuod nga nagahimo sang kahalitan sa pumuluyo. Sila ang matuod nga terorista!

Hustisya para sa mga biktima sang militarisasyon sa kabukiran!