Septyembre 3, 2021 ala-una sang hapon, patay si Elmer Caratu sang Brgy Nasunggan, La Libertad, Negros Oriental, samtang nagdinalagan naman ang 3 ka regular intel sang 94th IBPA nga mga kaupdanan sini sa madinalag-on nga partisan operation sang Leonardo Panaligan Command-New People’s Army. Natabo ini malapit sa Brgy Proper sang Brgy Nasunggan sakop sang amo gihapon nga banwa. Aktibo nga Commanding Officer sang CAFGU si Caratu sa Brgy Tinayunan Hill CAFGU Detachment sa Guihulngan City. Masupog nga tagtanum sang makinaryas sa paniktik sa mga baryo nga magsunod sa hulag sang NPA kag rebolusyonaryong masa sa lugar. Gunrunner kag shabu pusher si Elmer Caratu samtang Brgy Kagawad naman ini sa Brgy Nasunggan. Nakumpiska sa iya ang 1 ka Engram, 2 ka magasin kag mga bala.

Septyembre 2, 2021 sang hapon, patay man si Cerilo “Jerlo” Paderna. Natabo ang partisan operation sang NPA sa sityo Basyao, Brgy Pinukawan, Vallehermoso, Negros Oriental. CAFGU Commanding Officer si Paderna sang Brgy Maglahus CAFGU Detachment sa Vallehermoso, Negros Oriental. Si Paderna ang nagpareyd sa 2 ka NPA martir nga sanday Ka Joshua kag Ka Minggoy sadtong tuig 2012 sa sityo Natae, Brgy Bucalan, Canlaon City, Negros Oriental.

Agosto 18, 2021, patay si Jessie Silva sang sityo Bungao, Brgy Trinidad, Guihulngan City sang ginpatuman ang silot-kamatayon matapos ang pagpamatbat sang Rebolusyonaryong Korte sang Pumuluyo. Si Silva ang anay katapo sang CAFGU sa sityo Pukatod, Old Fabrica sakop sang La Castellana, Negros Occidental. Masupog ini nga informant sang 62nd IBPA sa lugar kag aktibo nga nagagiya sa mga operasyon militar sa border sang Magallon, Negros Occidental kag Guihulngan City, Oriental Negros. Siya ang tagsunod sa hulag sang NPA, nagabaton sang kantidad sang kwarta halin sa militar, nagpareyd sa pamilya Ibarle kag nagpadakop sa 2 ka beses kay Omar Ibarle nga isa ka mangunguma sa sityo Bungao, Trinidad, Guihulngan City.

Si Caratu, Paderna kag Silva ang mga lehitimo nga military target sang New People’s Army sandig sa kabug-aton sang ila nakomiter nga kaso sa rebolusyonaryong kahublagan.

Ginaklaro man sang Leonardo Panaligan Command-New People’s Army nga indi tanan nga CAFGU halos target sang NPA kag bug-os nga rebolusyonaryong hublag.

Magserbe ini bilang mabaskog nga paandam sa mga masupog nga katapo sang CAFGU kag mga informant sang militar batok sa CPP-NPA kag kabug-usan nga rebolusyonaryong kahublagan.