Mga kaupod kag pamilya sa rebolusyon,

Dungog sang Katipunan ng mga Samahang Manggagawa (KASAMA) sa Rehiyon sang Panay nga mangin kabahin sa subong nga kahiwatan sa ululupod nga pagsaulog sang kabuhi sa rebolusyon sang onse nga martyr sang Agosto 2024.

Sa pagbukas sang nahauna nga tuig sang selebrasyon sa bulan sang mga martyr sa rebolusyon sang rehiyon Panay kag bug-os nga rebolusyunaryong kahublagan sa Pilipinas, ilabi nga ginapagkit sa mga taguipusuon kag pamensaron namon nga mga katapuan sang KASAMA, ang mga dinalan nga “amon ipadayon mga kaupod,” sa pagsaludar sa kabuhi sang mga rebolusyunaryong martir sang Agosto.

Sa sini nga okasyon, amon man ginahatag ang mataas nga pagpasidungog sa mga kaupod nga martir halin sa kubay sang kasyudaran nga nagtulin sang pinakataas nga halimbawa sang kahandaan kag sakripisyo sang ginhatag sini nila ang ila ikasarang para sa armado nga paghimakas tubtub sa katapusan nga ginutlo sang ila kabuhi.

Sa pagpatuman sa importante nga responsibilidad sang urban nga pagsuporta sa armado nga paghimakas, padayon man nga buhi sa amon nga dughan kag pamensaron ang dinekada nga pag-ululupod, hugot nga koordinasyon kag pag suporta sa mga kaupod kag martir sa kaumhan pareho sang Prente Sur nga nangin “adoptive front” humalin sang Ikaduha nga Dungganon nga Pagpanadlong (IDKP).

Subong nga adlaw, may pipila sa amon nga katapo sang KASAMA, kag iban pa nga rebolusyunaryong organisasyon nga yari subong nagatambong. Mga kaupod nga nangin saksi man sang makasaysayan nga pag-umpisa tikang-tikang sang rebolusyunaryo nga kahublagan sa kasyudaran kag kaumhan. Mga kaupod nga nangin kabahin sang kabuhi sang aton mga martir sang sila lamharon pa. Mga kaupod, kag nagpabilin nga mga kaupod sa masobra tatlo, apat, tubtub lima ka dekada. Tuguti nga mangin saksi kami sa subong nga adlaw sang kadungganan nga ginbaton sang Panay gikan sa kabuhi sang aton mga martir, kadungganan nga ipanubli sa bwasdamlag, kadungganan nga igapagkit sa dinalan sang kasaysayan sang rebolusyon.

Sang naglipas nga Disyembre 2023, opisyal nga ginpahayag sang Partido Komunista sang Pilipinas (PKP) ang pagsakdag sang Ikatlo nga Kahublagan Panadlong internal sa organisasyon sang Partido. Bilang abanse nga destakamento sang proletaryado kag pangunahon nga tagsakdag sang Marxismo-Leninismo-Maoismo (MLM) nga rebolusyunaryong teorya, ginakilala sang KASAMA ang pangunahon nga papel, mga programa kag desisyon sang PKP para sa Demokratikong Rebolusyon sang Banwa sa ubay kag kongkreto nga aplikasyon sini sang MLM.

Ang pahayag sang PKP para sa kahublagan panadlong ginbunga kag ginbug-ag sang mga leksyon kag kabuhi sang mga kaupod nga hangaway kag masa, sang mga kadalag-an sa paghimakas kag pagpakig-away apang labaw sa tanan, sang kakulangan kag kasaypanan sa mga sandigan nga prinsipyo sang MLM, estratehikong linya sang sa armado nga paghimakas, pag-organisa sang Partido, Hangaway, baseng masa kag iban pa. Ang ini nga mga sala nga pamensaron kag praktika nagbunga sang dako nga kapaslawan, kahalitan kag signipikante nga mga buhin sang aton inaway banwa. Bisan pa man, indi matumbasan ang inagihan, kadalag-an kag sakripisyo sang aton mga pwersang masa, kadre, pulang hangaway kag mga martir nga naghawan sang banas agud malab-ot ang subong nga lebel kag kalawigon sang rebolusyon anuman kadako sang kahalitan nga naagom naton subong. Ini kag ang mga leksyon ang magserbe nga hinganiban agud matadlong ang kahuyangan kag kasaypanan, masakdag kag mapalig-on ang mga kabaskugan para mabawi ang ikasarang kag lebel sang inaway kag rebolusyon.

Indi hilway ang KASAMA sa nangin kakulangan kag pagsayop sa pagkabuhi sang iya sini mga prinsipyo, katungdanan kag papel sa armado nga rebolusyon. Hugot nga naga upod ang KASAMA sa pagtigayon sang mga hilikuton panadlong.

Tuman ka malahalon ang papel sang KASAMA sa rebong kahublagan sa urban ilabi na sa kubay sang imol sa syudad sa DRB. Matungdan niya lamang ini kung may mabaskog kag mabakod nga rebong kahublagan sa mga komunidad. Sentral sini nga katungdanan ang pukawon, organisahon kag pahulagon ang malapad nga masang mamumugon kag mala-mamumugon kag iban pa nga anakbalhas sang kasyudaran bilang kabahin sang kahublagan sang mamumugon para sa demokratiko nga rebolusyon sang banwa. Matungdan niya lamang ini kung may mabaskog kag mabakod nga rebong kahublagan sa mga komunidad kag gagmay nga mga palamugnan.

Bilang Kabahin sang Pungsudnon nga Nagahiliugyon nga Prente, nga nagasandig sa kusog sang sandigan nga alyansa sang mamumugon kag mangunguma, gintiglawas sang KASAMA ang pinakamalapad nga pwersa sang mamumugon kag anakbalhas sa syudad.

Sa pagkilala sang papel sang armado nga paghimakas paagi sa Bag-ong Hangaway sang Banwa bilang pangunahon nga armas sa pagsulong sang Malawigan nga Inaway Banwa (MIB) kag Rebolusyunaryong Kahublagan sang Mangungma, katungdanan sang KASAMA ang pagpakigbahin sa armado nga paghimakas paagi sa pagpadala sang iya pwersa para sa BHB kag paghatag sang kinahanglan nga suporta para sa iya hangaway.

Sa kahigayunan sang ikatlo nga kahublagan panadlong, bilang pagpasidungog sang aton mga rebolusyunaryo nga martir, ginapasalig sang KASAMA ang mas malig-on nga pagsakdag sang teorya kag praktika sang MLM sa rebolusyon kag pagtungod sang partikular namon nga papel sa rebolusyon.

Para sa KASAMA
Ka Mayak
Agosto 24, 2025