Paturagas nga nagstraffing ug nangrocket ang mga pasistang 8th IBPA sa gomahan ug sikbit nga mga uma sa Purok 8, Brgy. St. Peter, Malaybalay City. Tungod kini sa duha ka engkwentro tali sa NPA ug AFP niadtong alas-4:00 sa hapon sa November 15, 2022 sa maong baryo.

Nasugukan sa 8IB-PA ang usa ka yunit sa NPA ug unang nakapamusil ang AFP apan wala makaigo sa kauban. Pagbalos sa mga NPA, nakita nga adunay isa ka sundalo nga nahagba. Nikabat og 20 minutos ang maong panagsangka. Ugma, pagkabuntag, November 16, gibalikan sa NPA ang nahitaboan. Gisnayp ug gi-harass ug adunay usa pa ka patay sa AFP.

Ang balos sa kahanginan pagka-alas-7:20 sayo sa buntag, walo ka rocket ang nitugpa ug lima ka hugna nga straffing gikan sa .50 caliber machine gun gikan sa McDonnell-Douglas 520 (MD520). Nikabat og 40 minuto ang pagpamomba. Sa ikaduhang hugna, gikan alas-9:25-9:35 sa buntag, naghulog na sab og walo ka rocket ug nagpabuto og tulo ka hugna gikan sa .50cal machine gun.

Tungod sa wala makaigo ang AFP sa bisan usa ka NPA, gipahimungtan ug gihasi sa mga pasistang AFP ang masa ug mga residente sa maong baryo ug mga kasikbit nga lugar. Grabe ang kalisang sa mga tao, samot na ang mga naa sa uma ug mga tapper sa goma. Nagkapuliki sila og pangdagan kay maghulog na og rocket ang MD520 nga nakatungod sa ilang baryo. Ang mga teacher ug estudyante nga nagklase sa eskwelahan sa St. Peter nalisang sab pag-ayo. Nanghapa sila samtang nagsaoy-saoy ang bomber aircraft labina kung didto sa ila motungod.

Ang mga gomahan ug uma duol sa komunidad usa sa mga tinubdan sa panginabuhian sa mga lumulupyo. Taliwa niini, milyun-milyong peso ang ginawaldas sa AFP ug gubyerno mismo sa paggamit og kusog nga mga himan nila nga nagaguba sa umahan ug kinaiyahan ug dili man lang makaigo sa ilang mga target. Mas tumong nila ang pagpanghadlok ug pagterorisa sa masa aron iundang ang pagsuporta nila sa hukbo ug sa rebolusyon.

Niini, gnakundena sa NPA NCMR ang pagpahimuntang sa mga pasistang tropa sa 8IBPA ngadto sa masa ug sibilyan nga walay katakos nga mosukol. Lapas sa tawhanong katungod ang ilang pagpanimalos sa mga walay sala sa ila. Sa ilang pagpanghadlok sa mga residente sa lugar, pagguba sa ilang tinubdan sa panginabuhiang mga umahan ug gomahan, pagguba sa kinaiyahan, ug pagpasangil sa ila isip tigsuporta sa rebolusyon mas makapahimulag sa 8IB ngadto sa masa. Samot na hinuon mangita og armadong kusog ang mga biktima sa pagpanghasi ug kanunay andam ang NPA sa mga yangongo sa masa.