Sadtong Hunyo 14, 2023, wala pagduhaduha nga ginmasaker sang 94th IB kag iban pang ahente sang estado ang pamilyang Fausto sa Sitio Kangkiling, Barangay Buenavista, Himamaylan City kon diin lakip sa ila ginpatay ang mag-asawa nga si Rolly kag Imelda Fausto kag ang ila 2 ka menor de edad nga mga kabataan.

Parehas nga mga katapo sang organisasyon nga iya sa mangunguma ang mag-asawa. Aktibo silang nagabulig sa kaangay man nila nga mga mangunguma nga biktima sang pagpang-agaw sang duta sa mga agalon-mayduta, manubo nga presyo sang ila mga produkto, kag nagaabaga sang kawad-on sang subsidyo kag suporta halin sang reaksyunaryong gobyerno bisan pa man nga nagasandig sa ila sektor ang seguridad sa pagkaon sa bilog pungsod.

Ginapakigbato nila ang kinamatarung sang mga mangunguma kabangdanan nga nangin init sila sa mata sang mga bayarang militar nga nagapasiguro sa interes sang nagaharing sahi. Nakaagi sila nga ginpahug sang mga uhaw sa dugo nga 94th IB kag ginkumbinsi nga mangin asset batok sa rebolusyonaryong kahublagan matapos nga ginpasibangdan nga may koneksyon sa NPA. Bangud wala nakahatag sang mga datus sa mga tropa militar, masaker ang naaguman sa pamilyang Fausto. Tubtub subong, wala gihapon sang mga napasabat sa armadong bayaran sang reaksyonaryong estado kag wala gid nahatagan sang hustisya ang brutal nga pagpamatay.

Indi na bag-o sa kasaysayan ang brutal nga mga hinimoan sang AFP, PNP, kag NTF-ELCAC kaangay sa pagpamatay sang mga pumuluyo nga nagahimakas para sa ila kinamatarung kag pangabuhian. Magluwas sa ini nga pamilya, lakip sa mga biktima sang pasistang estado nanday mag-utod nga Sabanal matapos ang engkwentro sa Sitio Malikoliko, Barangay Carabalan, Himamaylan City sang Marso 2022; Padon Tingal nga lider-mangunguma nga taga Sitio Dangalon, Barangay Hilamonan, Kabankalan City sadtong Mayo 2023; kag Jomarie Calumba nga taga Sitio Mugni, Barangay Oringao, Kabankalan City sadtong Pebrero 2023 kag madamo pa nga iban. Ang mga nasambit nga biktima ang ginpagawas nila sa media kag publiko nga mga katapo sang NPA agud makaluwas sang ila salabton sa pagpatay sang mga sibilyan.

Tubtub lang sa papel ang ila mandato nga pagpangapin sa pumuluyo bangud sa reyalidad, mga ayam lang man sila nga nagadawat sweldo sa mga agalon-mayduta, mga komprador burgesya kag burukrata kapitalista nga amo man ang naglingkod sa posisyon sang gobyerno. Sila mismo ang nagapalapnag sang inhustisya sa mga komunidad, amo nga yara ang matuod nga soldado sang pumuluyo, ang NPA, agud sukton ang kriminal nga AFP, partikular na ang 94th IB sang ila krimen kag impyunidad.

Padayon nga ilunsar sang RNC-NPA ang mga taktikal nga opensiba sa South Central Negros. Paagi sa lupok sang pusil, ginapalanog kag ginahatagan sini sang hustisya ang tanang biktima sang pasistang estado.