Sa unang adlaw sang Septyembre, ara naman ang 94th IB sang ila obra nga pagpalapnag sang kakugmat sa South Central Negros.

Sa Sityo Ompokon, Barangay Buenavista, Himamaylan City, Negros Occidental, ginkastigo sang nasambit nga militar ang duha ka sibilyan nga mga mangunguma nga naga-inom sa ila puluy-an. Nakilal-an ang mga biktima nga sanday Bandre Mahinay, kwarentahon ang edad kag si Jerin, trayntahon ang edad kag may asawa. Parehas man sila nga mga pumuluyo sang amo nga lugar.

Dugang diri, ginpilit man nga pa-bakwiton sang amo gihapon nga pasistang tropa ang mga pumuluyo sa sini nga lugar kag ginpahug sila nga ipaidalom sang “no man’s land” ang ila komunidad. Nakibot man ang mga pumuluyo sa sini nga deklarasyon bangud wala man nagkalatabo nga engkwentro sa lugar ukon bisan ano nga paigo nga basehan para ipatuman ini.

Samtang sa Sityo Dangalon, Barangay Hilamonan, Kabankalan City, Negros Occidental, duha ka kolum sang mga pwersang sang 94th IB ang nagatiner sa lugar.

Magluwas pa sa baha kag iban pa nga mga kalamidad nga nagadislokar sang mga pumuluyo bangud sa kontrobersyal kag puno sang korapsyon nga mga ‘flood control projects’, yara man ang nagahagna nga pagkadislokar kag pagkaguba sang pangabuhian sang mga pumuluyo ilabi na sa mga mangunguma bangud sa padayon nga militarisasyon sa kabukiran, sa pagpanguna sang Armed Forces of the Philippines (AFP), Philippine National Police (PNP), kag NTF-Elcac sa ila pagpatuman sang National Action Plan for Unity, Peace and Development (NAP-UPD).

Ginapanawagan sang Romeo Nanta Command-New People’s Army (RNC-NPA) nga maghiliugyon ang bilog pumuluyo sa lugar kag ipakigbato ang ila kinamatarung. Sa pihak sini tanan, nagapamatuod lang ini nga wala iban nga solusyon sa inhustisya nga naaguman sang bilog pumuluyo kon indi ang pagpakigbahin sang armadong rebolusyon.