Sa pagtalakay sang badyet sang NTF-Elcac sa kongreso para sa 2025, nahublasan ang korapsyon sini. Nagpahayag ang Department of Interior and Local Government (DILG) nga wala pa sang bisan isa sa 885 Barangay Development Project (BDP) sa 2024 ang napatuman kag sadtong 2023, mga 51 porsyento pa lang ang ila na implementar. Sa amo sini, luyag pa nila magproponer sang ₱7.8B sa 2025 nga badyet.

Wala huya ang NTF-Elcac nga magpasaka sang ila badyet para sa benepisyo sang mga opisyal sang militar kag mga burukrata. Gamiton man ini sa terorismo batok sa malapad nga pumuluyo ilabe na sa mga mangunguma sa kabukiran.

Samtang ginpasakaan ang badyet sang militar sa depensa kag lakip na ang NTF-Elcac, ginpangbuhinan ang badyet sang iban nga departamento nga direkta nagaserbisyo sa pumuluyo pareho sang agrikultura, ikaayong lawas kag edukasyon. Barahubal man nga ginbalhin ang ₱89.9 bilyon nga sobra nga badyet sang Philhealth nga pagagamiton dugang sa imprastruktura, nga bisan paracetamol wala sang igabakal ang mangunguma kag mga pigado kon sila magmasakit.

Halos 90% sang pumuluyo nagaantus sa kakulang sang serbisyo sosyal, apang ginpribatisa pa ini kag ginhimo nga negosyo. Ang buwis nga ginakuha sa pumuluyo halos nagakadto na sa korapsyon kag badyetan lamang sang ₱64 kada adlaw ang pagkaon sang pumuluyong Pilipino, samtang sila ang nagapagusa.

Nagapakita lang sang pagkakorap kag pagka-pasista sang rehimen ni Marcos Jr Ang madata nga paglapas sang tawhanon nga kinamatarung sang NTF-Elcac upod ang AFP-PNP ginapabugal bilang pagpaseguro sang ‘katawhayan kag seguridad’ sang pungsod. Samtang ang mga mangunguma kag mamumugon nga amo ang nagabuhi sang bilog nga pumuluyo, nagapa-sweldo, nagapa-biste kag nagapakaon sa AFP-PNP amo pa ang ginapamatay, gina-redtag kag gina-sarbeylans tungod sa ila pagpamalabag kag pagbato sa mga inhustisya nga ginahimo sang estado kag pagpamatuk sa pagpatuman sang mga neoliberal nga mga proyekto nga nagaguba sang ila palangabuhian.

Indi mag-untat ang mga mangunguma kag mga mamumugon sa uma sa pagpukaw, pag-organisa kag pag-mobilisa sang ila hanay upod sa malapad nga pumuluyo agud tapuson ang madugay na nga pag-antos sa gutom, pagpanglapak sa tawhanon nga kinamatarung kag tanan nga porma sang mga inhustisya sosyal nga kahimuan sang estado, gamit ang iya ahensya sa pagpang-ipit pareho sang AFP-PNP.

Mabaskog nga ginapanawagan sang PKM-Negros nga bungkagon ang NTF-Elcac kay nagatuga lang ini sang perwisyo sa malapad nga mangunguma. Dapat hatagan sang prayoridad sang rehimen ni Marcos Jr ang badyet sa agrikultura kag suportang serbisyo sang mga mangunguma agud mapadaku ang produksyon sa pagkaon. Dapat dugangan ang badyet para sa serbisyo sosyal kaangay sang edukasyon, pabalay, ikaayong lawas kag iban pa para sabton ang nagalala nga krisis pang-ekonomiya sa pungsod.###