Sulod lamang sa isa ka semana, nakatala naman sa panibag-o nga duha ka kaso sa paglapas sang tawhanon nga kinamatarung ang 94th IBPA batuk sa mga sibilyan sang Himamaylan City.

Nobyembre 11 sang aga, gindakop, gin-imbestigar kag ginkastigo sang mga tropa sang 94th 1B si Tata Balasabas, 36 anyos, may asawa, sa Sitio Pisok, Bry Buenavista samtang nagapahuway sa ila balay. Grabe ang kahadlok sang iya bag-o lang nagbata nga asawa nga nagdalagan pakadto sa Sitio Cantupa para magpangayo sang bulig. Gindala si Balasabas sa lati kag pila ka oras nga gindetini sang tropa militar.

Nobyembre 14 sang hapon, ginkuha sa pila ka katapo sang 94th IB nga nakakampo sa Mahalang Charlie Coy Detachment ang 14 anyos nga dalagita nga si Jelca Ariola sa Sitio Suba-Suay, Brgy Mahalang. Nagapapuli na si Jelca halin sa iya eskwelahan sang ginpalapitan kag gindala siya sa mga militar sa ila detatsment. Gin-imbestigar kag ginpahug ang dalagita nga kon indi magsugid kon diin ang iya mga pamilya nga gin- alegar sang mga suldado nga mga NPA, pagadakpon siya. Pila ka oras man gindetini ang dalagita antes ginpapuli sa ila balay. Grabe ang kaakig sang pamilya Ariola sa nadangtan sang ila himata.

Kadungan sa pagtabon sa ila mga kalapasan, nagpresentar na man sa lain nga bats sang kuno 24 ka surrenderees sa nanligad Nobyembre 14 sa Himamaylan City, sa pagpanguna sang butigon nga 94th IB kumander nga si LtC. Van Donald Almonte. Segurado nga liwat naman ini makakamal sang pundo sa ila matiplangon nga E-CLIP program. Madumduman nga masobra pa lang sa isa ka bulan ang nagligad sa pagpagwa nila sang 27 ka peke nga surrenderee sadtong Septyembre 27. Wala gid sang kahubason ang mga surrenderees nga ila ginapagwa sa Himamaylan City. Magluwas nga gatasan sang AFP ang mga fake surrenderees, gusto gid ipakita sang manugtaghol sang AFP nga madinalag-on ang ila kampanya kontra-insurhensya sa Himamaylan City.

Baliskad sa kamatuoran nga ang pumuluyo sa nabukid nga bahin, indi lang sa syudad sang Himamaylan kundi pati na sa Binalbagan, Kabankalan City, Isabela kag sa mga katambi sini kaangay sa La libertad, Jimalalud kag Tayasan sa Negros Oriental padayon nga naga-eksperyensya sang ala Martial Law kag masingki nga operasyon militar. Ang ini nga mga lugar ginaatake sa militar bangud ara kuno nagabase ang mga yunit sang NPA, pero mga sibilyan, nanguna mga mangunugma, ang nangin mga biktima.

Gani, indi mapunggan sa matiplangon nga propaganda sang reaksyonaryo nga tropa ang paghimakas sang pumuluyong Negrosanon. Samtang padayon nga nagalala ang krisis sang mala-kolonyal kag mala-pyudal nga sistema sa pungsod kag indi masabat ang matuod nga ugat sang armado nga pagbato sang pumuluyo, indi gid bisan san-o man matapna kag mahubas ang pwersa sang rebolusyon.

Matiplangon kag mapintas ang atake militar apang amu man ang rason nga mas makapalapad pa kag makapalig-on ang rebolusyonaryo nga pwersa tubtob sa mas mataas pa nga halintang sang pangmalawigon nga inaway banwa. ###