Isa ka tuig na ang naglabay sang ginpaidalom sa isa ka semana nga de facto martial law kag lockdown ang Himamaylan City, Negros Occidental halin Oktubre 6 tubtob 15 sang nagligad nga tuig 2022. Ginabulabanta 500 ka tropa sang 94th IB kag kapulisan ang ginmobilisa sini nga panahon. Ginpahamtangan ang militarista nga lockdown nga nagpaantus sa liboan ka pumuluyo nga daan na nga nag-atubang sa tuman ka pait nga pangabuhi.

Isa ka tuig na pero preska pa sa panumduman sang mga Himamaylanon ang nagkalatabo sa ila kon sa diin duha ka adlaw nga ginbombahan ang mga komunidad sang Brgy. Carabalan, patarasak nga nagpinalupok ang nasambit nga militar gamit ang helicopter, pagpangastigo sang pito ka mga sibilyan, pilit nga pagpabakwit sang mga residente kag ang pag-ihaw sang mga kasapatan sa mga mangunguma sa tion nga wala na sila sa ila mga panimalay. Halos 18,000 ka pumuluyo ang biktima sang militarisasyon sa lugar kag masobra P400,000 ang gingasto sang militar sa pagpamomba lang.

Sa subong, sa pihak sang todo bubo sang pundo sang rehimen US-Marcos II paagi sa lokal nga panggamhanan sini sa porma sang mga farm-to-market road idalum sa Barangay Development Program (BDP) kag iban pa nga programa nga wala man nagasabat sa mayor nga problema sa malapad nga pumuluyo labina sa mga mangunguma.

Wala sa gihapon nga natabo nga paglambo ukon pagbag-o sa kahimtangan sang masang anakbalhas ilabi na sa mga Himamaylanon. Kakha-tuka ang matuod nga laragway sa masa kon sa diin nagaantus sa manubo nga sweldo ang mga mamumugon sa uma, barato nga bili sang produkto sang mangunguma, wala preno nga pagsaka sang presyo sang mga balaklon kaangay sang bugas, mga panakot, kag iban pa nga mga sandigan nga balaklon. Samtang kadungan sini nga kapigadahon amo man ang kabugana sang pipila sa nagaharing hut-ong nga amo ang nagapuga sang manggad kag kusog sang pumuluyo para sa ila kaugalingon nga interes.

Ang sosyo-ekonomiko nga kahimtangan sa pungsod Pilipinas nga ginaatubang subong sa pumuluyong Pilipino ang ginadugangan pa sa wala nagakasanto nga mga tikang kag plano sang rehimen Marcos II. Mas ginakonsolida sini ang iya gahum kag ginapaboran ang iya alipures para mapaseguro ang ila interes.

Todo larga na ang pagbaligya sang manggad sa pungsod kag ang pagpabuylo sang pagtukod sang mga baseng militar sang US nga klaro nga magadalahig sa pungsod sa mas malala pa nga katalagman sa palaabuton.

Wala sang kinatuhay ang kasamtangan nga US-rehimen Marcos II sa iya amay nga isa man ka diktador. Krisis, kagutom, pasismo kag kakugmat ang ginhatag sini sang pumuluyo labina sa sahing anakbalhas nga mangunguma kag mamumugon.

Kon pasismo ang sabat sa singgitan sang pumuluyo sa ila mga handum kag demanda, indi maga-untat ang tuburan sang armado nga paghimakas. Nagahandum ang rehimen US-Marcos II, ang Armed Forces of the Philippines (AFP) kag Philippine National Police (PNP) nga madugmok ang NPA sa basehan sang madamuan nga pagpresentar sang peke nga mga surrenderees, pagpangdakop sang mga ginadudahan nga supporter sang NPA, ang ginpangalandakan nga localized peace talk kag ang subong nga ginatanyag nga amnestiya para sa mga rebolusyonaryo. Klaro nga mapaslaw lang ini bangud sila mismo ang nagahawan sang dalan para sa pumuluyo nga mag-usoy sang dalan sang pagbato kag armadong paghimakas. Matambok ang duta para sa rebolusyon.

Ginapasidunggan sang MCC-NPA si Ka Juanito Magbanua (Romeo Nanta), anay tigpamaba sang NPA Negros, nga brutal nga ginpatay sang mga pasistang idu-ido sang 94th IB sang gindakop sa Sitio Medel sadtong Oktubre 10, 2022. Kaangay ni Ka JM ang isa ka matuod nga rebolusyonaryo nga wala nagabuhi sa mga rebolusyonaryo nga prinsipyo kag determinado nga magasulong sa bisan ano pa man nga kabudlayan. Ang matuod nga pagbag-o, kahilwayan kag demokrasya maangkon lamang paagi sang matuod-tuod nga pagrebolusyon, nagapanindugan kag wala nagasungka sa kaaway kag sang nagaharing hut-ong.###