Indi matuod kag lunsay fake news ang ginpaggwa sang Commanding Officer sang 94th Infantry Battalion nga si LtC. Van Donald Almonte nga kuno nakarekober sila sang 10 ka landmine kag halos 2,000 rounds sang .30 cal. machine gun sa isa ka ginbayaan nga kampo sang NPA sa bukid sang Himamaylan City, Negros Occidental.

Isa ini ka propaganda sang AFP/PNP/NTF-ELCAC nga gusto lamang hinabonan ang mabaskog nga panawagan kag nagalanog nga pagkomemorar sang ika-50 tuig nga pagsukat sang Martial Law sa panahon sang anay diktador nga si Ferdinand Marcos Sr. Nagangurob sa bilog pungsod Pilipinas ukon naga-trending kon sa social media ang mabaskog nga pagbatok sang pumuluyo sa pilit nga pagtorsi sang madulom nga kasaysayan sang pungsod ilabi na sang nakapungko na liwat sa gahum ang mga Marcos kag katimbang ang lain man nga kriminal nga pamilyang Duterte. Indi lang ang mga biktima, mga progresibo kag patriyotikong organisasyon ang nagtigayon sang komemorasyon kundi bisan sa lain-lain nga mga akademikong eskwelahan paagi sang pagsuksuk sang itom nga bayo.

Nagtinguha ang AFP/PNP/NTF-ELCAC nga mahinabunan ang mga aktibidad kontra-Marcos paagi sa ila mga propaganda/fake news para i-highlight ang ila kuno mga achievements sa subong idalum sang US-Marcos II nga rehimen. Planado kag sistematiko ang ila propaganda nga gingamitan sang mga scripted kag well-rehearsed nga mga videos kag pictures. Apang paslaw sa gihapon bangud kon tulukon sa picture daw gubaon kag piho nga indi na maglupok ang ila mga props.

Pero sa punta sini tanan, indi nila matabunan ang matuod nga eksperyensa sang pumuluyong Pilipino sa maduguon kag madulom nga panahon sang Martial Law. Ilabi na nga indi nila mahinabunan ang pang-ekonomiko nga krisis sa subong nga gina-antus sang pumuluyo. Ang mga paglapas sang 94IB sa tawhanon nga kinamatarung kaangay sang pagpamatay, pagpangtortyur, pagpamomba, pagpamahug, kag paglagas sa mga inosente nga kabataan dugang nagpahinumdom sa pumuluyo sang grabe nga pasismo nga ila nasumalang idalum sang diktadurya ni Marcos.

Padayon nga dumdumon sang pumuluyo ang mga kalakasan kag inhustisya sang Martial Law indi lang sini nga bulan kundi tubtob ara sa poder ang mga Marcos. Lauman nga masako man ang mga trying-hard director kag mga manogtaghol sang AFP/PNP/NTF-ELCAC para masusteni ang ila matiplangon nga propaganda.