Focus Military Operations sa Sentral Panay, Ilusyon nga Mapapas ang Armadong Paghimakas sa Isla
![]( https://philippinerevolution.nu/wp-content/uploads/2024/08/npa-central-panay-jose-percival-estocada-jr-command-2-1024x576.png )
Kakugmat kag kasablagan sa kabuhi, pangabuhian kag sa malinong nga pagsinarayo sang pumuluyo ang pagdagsa sang militar sa kabukiran sang Sentral Panay sa ila pinasingki nga focus military operation sa ila paghingamo nga papason ang rebolusyonaryong kahublagan sa sini nga tuig 2024. Masobra tatlo ka batalyon sang army sa idalom sang 3rd Infantry Division upod sa kapulisan kag mga CAFGU ang gindeploy sa pila ka kabaranggayan sa lindero sang Capiz, Aklan, Iloilo kag Antique. Para kuno ini manglugas sa pagpangita sang NPA sa ila desperado nga handum nga madeklarar nga insurgency free na ukon wala na sang NPA sa isla sang Panay.
Ang ini nga deklarasyon sang militar nagapamatuod lamang sang ila kapaslawan sa pihak sang ila mga pagpabugal nga kuno mahina na kag ilisipon na lang ang nabilin nga pwersa sang NPA. Nagapakita man ini sang labi nga pagpasingki sang ila operasyon militar paagi sa sobra-sobra nga paggamit sang daku nga pwersa sa ila man ginapatihan nga kuno gamay na man lang ang NPA nga nabilin, maluya kag wala na sang ikasarang nga maglunsar sang taktikal nga opensiba.
Ang ila wala untat nga deklarasyon kag nagapadayon nga focus military operations magakahulugan lamang sang paglala sa kakugmat kag kahadlok nga nabatyagan sang pumuluyo kadungan sang padayon nga huol ukon pagkaistorbo sa ila matawhay nga pagpangabuhi.
Gapakita man ini nga bisan sila, ang militar kag ang reaksyunaryong estado, wala lubos nagapati sa ila mga ginahambal. Tigaylo, ginakibang man mismo sang sining ila mga deklarasyon bangod sa sige-sige nga pagpadamol sini sang ila pwersa militar sa ginapokusan nga lugar ukon kabaryohan. Buot hambalon man lang nga pagapasingkion sini ang pagpamigos kag pagpang-ipit, pagpamahog,pagkontrol sa hulag sang tawo kag blokeyo sa pagkaon paagi sa pagpa-idalom sang pumuluyo sa kontrol sang militar. Ilusyon nga katuyuan sini amo nga pwersahan nga mapunggan ang pagsuporta kag pagsakdag sang pumuluyo sa armadong paghimakas. Gani magaresulta ini sa dugang nga mga paglapas sa tawhanon nga kinamatarung sang mga pumuluyo kapareho sang ila mga ginapanghimo umpisa pa sang nagliligad.
Bisan pa nga napatyan sang pito ka kadre sang Partido kag katapu sang Bagong Hukbong Bayan ang rebolusyonaryong armadong kahublagan sa isla sang Panay, wala ini nagakahulugan sang pagka-dismantle ukon pagkabungkag. Tigaylo, padayon ini nga magasulong bangod wala pa malubad ang matarung nga basehan sa pag-bitbit sang armas sang mga pigos nga pumuluyo.
Ang natabu nga pila ka serye sang depensiba sa sentral nga Panay, matuod isa ka lebel sang kapyerdihan sa armadong kahublagan apang labaw sa tanan isa ini ka pangmalawigan nga kapyerdihan sa kubay sang teroristang reaksyunaryong estado kag bayaran nga berdugong militar bangod ginapukaw lamang sini ang kaakig sang masang anakbalhas kag ginpamatud-an man sini ang iya pagka-kriminal, pagka-mapintas kag pagka-uhaw sa dugo.
Wala sang maidul-ong nga anuman nga kaayuhan ang malapnagon kag masingki nga militarisasyon sa kaumhan, partikular sa kadam-an nga masang mangunguma nga naga-antus sa gutom, malapnagon nga kaimulon, kawad-on sang pangabuhian, kamahalon sang mga basehan nga balaklunon ilabi na gid sang bugas, wala untat nga pagsaka sa presyo sang gatong, kawad-on sang serbisyo sosyal, kawaay tikang sa kahalitan sang kalamidad, korapsyon sa burukrasya sang gobyerno korapsyon sa AFP kag PNP, paggiging tuta sang imperyalistang US kag ang padayon nga pagpabaya sang rehimeng US-Marcos sa iya mga katungdanan sa pumuluyo.
Ginasaludaran sang Partido ang mga pulang hangaway nga nagkalamatay sa erya sang Sentral Panay bilang mga baganihan sang pumuluyong Pilipino.
Tubtub buhi naton nga pagadumdumon sanday Benjamin Cortel (Ruby/Mamang), Jose Jerry Tacaisan (Miller), Aurelio “Boy” Bosque (Rio/Zarko/Baijan), Rumulo Ituriaga Gangoso (Regan/Pidek), Armando Rogelio Sabares (Nene/Kulot), Jovelyn Silverio (Akay, Purang), Jielmor Gauranoc (Doc/Tango).
Gintalikdan nila ang tanan nga kahamungayaan sa kabuhi para pangapinan ang masang tumandok kag mga mangunguma kag para isulong ang pungsudnon nga handum kag pangkatilingban nga kahilwayan. Ang ila kabuhi kag pagsakripisyo, upod sa madamo pa nga martir, mangin tubtob buhi nga handumanan kag inspirasyon para sa pumuluyong Pilipinhon sa ila paghimakas asta nga maangkon ang ginahandum nga kadalag-an.
Paslawon ang mga FMO sa Sentral Panay!
Pasingkion ang inaway banwa!
Mabuhay ang mga baganihan sang rebolusyon!