Duha ka bulan na sukad misugod pagkuyanap ang usa ka mananakod nga balatian sa pipila ka mga komunidad sa Lumad sa Brgy. Upper Suyan, Malapatan sa Sarangani Province. Gikumpirma sa mga sibilyang organisasyon sa lokalidad nga niadtong hinapos sa Nobyembre miabot na og dili moubos sa 22 ka mga lumulupyo B’laan ang nangamatay gumikan niini. Mga kabataan ang kadaghanan sa mga natakboyan ug nangamatay. Sumala sa taho, ang maong balatian anaay mga sintomas nga susama sa tipdas.

Ang mga komunidad nga apektado sa epidemya mao ang Datal Nay, Upper Kiogam, Lower Kiogam, Dlumay, Alna, Maybaka, Mahayag, Glandang, Matsuli, ug Upper Kihan, tanan nahimutang sa Brgy. Upper Suyan. Sa sayong yugto pa lamang sa epidemya, milihok dayon ang NPA nga nag-opereyt sa lugar pinaagi sa paghatag og mga serbisyong medikal ug pagtabang sa mga lumulupyo. Ang komite sa Partido pormal nga nagpahisayod sa konseho sa barangay sa Upper Suyan, sa LGUMalapatan ug sa gubyerno probinsyal sa Sarangani kalabot sa pagkuyanap sa maong sakit, ug gisugyot sa lokal nga gubyerno nga mosusi sa mga apektadong lugar ug mopahigayon og medical mission didto. Apan napakyas ang LGU nga mohimo og hinanaling aksyon.

Dihang gimontar na ang medical mission, midesisyon ang LGU nga pagahimoon kini sa mga lugar nga haduol lamang sa sentro sa barangay. Wala niini gikunsidera ang mga kalisdanan sa mga maysakit nga moadto alang sa pagpatambal, ug mihimo pa og bakak nga rason nga wala kunoy kaagiang dalan padulong sa mga apektadong lugar. Gipursige sab sa LGU nga modala kini og military escorts sa ilang pagpahigayon sa medical mission. Giila sa NPA-Sarangani Province nga usa ka kalamidad ang kahimtang nga ilang giatubang ug mahukmanong gipatuman ang mga tawhanong katungdanan niini.

Samtang ang reaksyunaryong gubyerno wala pay gihimong pahayag kalabot estado sa lugar ug ang 73rd IBAFP kinawat-kawat nga nagapursige sa pagpatuman sa ilang opensibang operasyon. Usa ka adlaw ayha misugod ang medical mission, miabot na ang mga tropa sa AFP sa mga komunidad sa Lino, Mahayag ug Maybaka nga sakop sa Brgy. Upper Suyan. Naggikan ang maong mga tropa sa Don Marcelino, Davao Occidental ug mibaklay og usa ka semana padulong sa Brgy. Upper Suyan. Hilabihang nahasi ang mga maysakit ug ilahang mga pamilya sa presensya sa mga pasistang pwersa, ug tungod niini midumili na silang moadto sa medical mission. Padayong gikuptan sa mga Pulang manggugubat ang ilang mga katungdanan samtang nagkadaghan ang mga maysakit nga nagbalibad nang moadto sa medical mission para magpasuta. Niadtong Nobyembre 29, usa ka Pulang manggugubat ang gibanhigan sa mga pwersa sa 73rd IB-PA sa sityo Sulkili, Brgy. Kihan, Malapatan samtang padulong siya sa pagasikaso sa masa. Gigamit sa reaksyunaryong pwersa ang medical mission aron piutan sa depensibong kahimtang ang mga rebolusyonaryo.

Among mainitong Pulang pagsaludo kay Ka Pedped nga misakripisyo sa iyang kinabuhi samtang nag-alagad sa mga maysakit ug nanginahanglan nga mga masang B’laan! Sumala sa mga taho sa NPA-Sarangani Province ug mga sibilyang organisasyon, ang mga komunidad nga giigo sa balatian nagaantos sa tumang ka mapiitong kahimtang. Ayha pa man ang epidemya, nadislokar ang maong mga komunidad tungod sa malanatong kampanyang militar sa AFP ug paturagas nga mga pagpamomba. Labaw pang nakapabug-at sa ilang mahuyang nga kahimtang ang kawala’y pagtagad sa reaksyunaryong gubyerno.

Ginapanawagan sa VPROC-FSMR sa tanang mga rebolusyonaryong pwersa, progresibong mga grupo ug indibidwal, mga dumadapig sa tawhanong katungod, mga patriyotikong propesyonal sa panglawas, sa International Committee of the Red Cross (ICRC) ug United Nations International Children’s Emergency Fund (UNICEF), ug sa mga relihiyoso ug sibil nga mga grupo, nga susihon ang mapit-os nga kahimtang sa mga Lumadnong komunidad sa Malapatan. Among ginaawhag ang inyong minagsoong suporta ug paningkamot nga mahatud ang tukmang medikal nga mga panginahanglan, mga pagkaon ug uban pang mga batakang kagamitan alang sa mga maysakit ug ilang mga pamilya. Amo usab ginapangayo ang usa ka independenteng medical mission ug wala’y pihig nga pagtuki sa makamatayng sakit.