Halit sang 301st Brigade sa tunga sang gutom sang pumuluyo
![]( https://philippinerevolution.nu/wp-content/uploads/2023/12/npa-central-panay-jose-percival-estocada-jr-command-map-1024x576.png )
Halit ang dala sang padayon nga focused military operations (FMO) nga ginalunsar sang mga tropa sang 12th IB, 82nd IB, 61st IB kag DRC sa idalum sang 301st Infantry Brigade sa mga binukid nga lindero sang Antique, Aklan, Capiz kag Iloilo.
Ginreklamo sang pumuluyo ang ginapatuman nga blokeyo sa pagkaon halin sang matabo ang mga serye sang engkwentro sa tunga sang tropa sang militar kag NPA sa mga banwa sang Calinog kag Lambunao, Iloilo sining nagligad nga unang semana sang Agosto. Limitado lang sa tatlo ka rayna ang bugas nga pwede madalawat sang isa ka pamilya. Daku ini nga perwisyo ilabi na para sa mga pumuluyo nga kinanglan magpanaw sang indi magnubo sa duha ka oras antes makaabot sa Barangay Caratagan, Calinog nga amo ang sentro sang komersyo kag ekonomiya sa ining mga binukid nga erya.
Magluwas sa paglimita sa ginabakal nga bugas, naglunsar man ang militar sang tsekpoynt sa diin ginapangbubo kag ginapang-ukay ang mga dala kag pinamaklan sang pumuluyo. Kon magbulto gani ang mga pinamaklan sang pumuluyo, ginasita kag dayon ginapasibangod nga iya ato suplay sang NPA. Bangud sa kalayuon sang ila mga baryo sa sentrong banwa, nangin kinaandan na sang pumuluyo nga halos tingub-tingub kon magpamalaklon sang ila panginanlanon sa banwa agud makatipid sa gastos sa pamasahe. May mga kaso man nga ang mga magkalapit nga mga pamalay, ginapaulayhon man ang ila balaklon sa kon sin-o man sa ila kalapit-balay ang magpabanwa gani indi katingalahan nga ang isa ka pumuluyo madamo sang dala nga pinamaklan.
Sa Barangay Cabatangan, Lambunao, Iloilo wala kaluoy nga gintiro patay sang militar ang karbaw sang isa ka mangunguma. Ang ini nga karbaw ang ginagamit sang mangunguma sa pag-ubra sa iya nga taramnan gani resulta sini ang pagbuhin sang iya kagamitan sa pagpanguma.
Ginpakita man sang pagka-waay balatyagon kag waay pag-ulikid sa gutom kag kabudlayan sang mga mangunguma ang paghimo sang militar nga hulugpaan sang helikopter sa isa ka uma sa Barangay Caratagan, Calinog, Iloilo. Nagkarahapay kag nagkarasamad ang mga tanom nga paray nga ginahulat-hulat sang mangunguma nga malapit na lang anihon, kon tani makatulutibawas na siya sa tama ka mahal nga presyo sang bugas pero wala na sya sang lauman pa nga anihon.
Kadungan sa pagdagsa sang mga tropa sang militar, ginbawalan man ang mga pumuluyo nga magkadto sa ila ulumhan o kon maglagaw sa talon. Bangud sa kakugmat kag kahadlok, natublag ang pagpangabuhi sang pumuluyo. Indi na nila ma-atender ang ila panguma kag kasapatan. Bisan ang pagpangigi sang lanot, pagpangalap sang uway,banban kag iban pa nga sorsa sang palangabuhian indi na mahimo sang pumuluyo bangud nahadlok sila magsughot sa talon. Ginakakulbaan nila nga makita sila sang militar kag tiruhon dayon pasibangdan nga NPA kaangay sang natabo kay Baby Colao sa Barangay Dalagsaan, Libacao, Aklan kag sa may sakit sa paminsaron nga si Bombik Vicente Bajoyo sa Barangay Jayobo, Lambunao, Iloilo.
Tungod sini, dugang nga gutom ang ginaantos sang pumuluyo nga wala pa makatibawas sa epekto sang nagligad nga El Nino kag nagakahangawa pa sa posible mangin halit sang nagahana nga La Nina. Minilyon nga pondo sang banwa ang gina-usikan sang militar kag gobyerno sa paglunsar sang FMO nga wala sang nabulig kundi magtuga sang kugmat kag kulba imbes nga hatagan sang gilayon nga atensyon ang paghatag ayuda sa mga ginagutom nga pumuluyo.
Nagapanawagan ang NPA Central Panay sa tanan nga pumuluyo nga apektado nga manindugan kag hugpungon ang paghiliusa agud sukton ang militar kag gobyerno sa ila gintuga nga kahalitan sa kabuhi kag palangabuhian sang pumuluyo.
Pumuluyo, mangisog kag magbato!
Militarisasyon sa kaumhan pamatukan!
Pamatan-on mag-entra sa NPA!