Puno ng disimpormasyon at puro kasinungalingan ang laman ng ipinamahaging leaflet ng 65th Infantry Stalwart Battalion noong Marso 24, 2026 sa mga residente ng barangay Estampar, Cataingan, Masbate. Inaakala ng mga ito na kayang malinlang at pagtakpan ng mga nakasulat sa papel ang kanilang paglabag at krimen sa mamamayan at mapigilan ang patuloy na pagsuporta at pagtitiwala ng masa sa kanilang pulang Hukbo. Ganun din ang kagustuhan ng mga kabataan na lumahok sa armadong paglaban upang wakasan ang kawalan ng katarungan at inhustisya, ang pang-aapi at karahasan na kanilang nararanasan at kapabayaan at paglapastangan ng gubyerno sa kanilang karapatan at kagalingan.

Kahit bagong pakat sa prubinsya ang 65th Infantry Battalion, batid ng masang Masbatenyo na iisa ang kulay at doktrinasyon ng lahat ng pwersa ng estado – nagtatanggol at tumutupad sila sa atas ng kanilang among si rehimeng Ferdinand Marcos Jr na isang pasista, papet, magnanakaw at kontra-mamamayan.

Desperadong ginagamit ang lahat ng mapanlinlang na pamamaraan sa takot na muling makapagpalakas at makapagpalawak ang Bagong Hukbong Bayan (BHB) sa Masbate. Labis nilang kinakatakutan ang pagpartisipar o pagsampa ng mga kabataan sa pulang Hukbo. Kaya, maging ang mga paaralan sa Masbate sa panahon ng pasukan ay palagian na ring pinupuntahan at isinasailalim sa pag-iinspeksyon at nagpapakalat ng mga fake news laban sa rebolusyonaryong kilusan at NPA.

Subalit, mulat ang masang Masbatenyo sa katotohanang kung hindi dahil sa kanilang pulang Hukbo at rebolusyonaryong kilusan sa Masbate, hindi nawala ang dating mga krimen, pagnanakaw sa kanilang mga alagang hayop at pangangamkam sa kanilang mga lupang sakahan. Na ngayon ay unti-unting nanunumbalik dahil mismong ang mga militar at pulis ang gumagawa at nagpapasimuno. Sa halip na masugpo ang mga pang-aabuso at paglabag dahil nariyan sila sa lugar, mas dumarami at lumalala pa ang dinaranas na karahasan ng masang Masbatenyo.

Ang mga militar at pulis, sa halip na protektahan ang kabuhayan at buhay ng mga mamamayan bilang kanilang sinumpaan, sila pa ang nagiging katuwang ng mga dayuhan at lokal na mga mangangamkan ng kabuhayan at lupa ng mga magsasaka sa Masbate. Ginagamit nila ang dahas upang pasunurin sa kagustuhan ng kanilang amo ang mga magsasaka. Binubuwag nila ang mga samahan upang alisan ng kapangyarihan at lakas na lumaban ang mamamayan na ipagtanggol ang kanilang sarili, karapatan at kabuhayan.

Ang mas nakakaalam at makakapagkwento sa tunay na kalagayan at araw-araw na dinaranas ng masang Masbatenyo sa kamay ng mga berdugong militar at pulis ay sila mismo. Ang mumunting mga papel na ipinamamahagi sa kanila ay batid nilang hindi ito gabay para sa kanilang kaligtasan kundi babala sa kanila na malalagay sa panganib ang kanilang mga buhay kung patuloy silang susuporta at lalahok sa BHB. Kahangalan kung iniisip ng mga militar at pulis na mapipigilan nila sa ganitong paraan ang mamamayan. Ang ginagawa mismo ng mga militar at pulis at ang pagkainutil ng gubyerno ni Marcos Jr ang nagtutulak sa mamamayan na lumaban at mag-armas. Hangga’t nariyan ang pang-aapi at pagsasamantala, hindi mapipigilan ang muling pagdami at paglakas ng NPA sa Masbate. Higit sa lahat, walang sinumang makakapigil sa kagustuhan ng mamamayan na kamtin ang tunay na katarungan at kapayapaan sa pagpapatagumpay sa pambansa-demokratikong rebolusyon.