Ginpapaabot han Panrehiyon nga Kumand ha Operasyon han Bagong Hukbong Bayan (BHB) ha Eastern Visayas an pinakamatikas nga mapula nga pagbati ha ngatanan nga Pula nga kumander, mangaraway, rebolusyunaryo nga pwersa ngan masa nga Pilipino yana nga ika-57 nga anibersaryo han hinigugma naton nga BHB.

Gamiton naton ini nga adlaw agud pasidunggan an mga dakila nga martir han rebolusyon. Pasalamatan naton hira nga hinigugma naton nga mga kasama ha paghalad nira han ira kinabuhi para ha pagtatalwas han katawhan. Tagan naton hin nalalain nga pagkilala hira Propesor Jose Maria Sison, Benito Tiamzon (Ka Laan), Wilma Austria (Ka Bagong-tao), Jorge Madlos (Ka Oris), Antonio Cabanatan (Ka Manlimbasog), Prudencio Calubid (Ka Dindo), Jaime Soledad (Ka Jordan), Abdias Guadiana (Ka Omar), Mariano Adlao (Ka Paner), Helenita Pardalis (Ka Elay), Gil Giray (Ka Biboy), Victoria Paclita (Ka Sayne), “Ka Kara” ngan “Ka Ali.” Hinumdumon naton an maranggat nira nga pananglitan, ngan hinaot mapuno kita han ira diri napaparong nga rebolusyunaryo nga optimismo ha pag-atubang naton ha mga nalalain nga ayat han presente nga takna han pakigbisog.

Ginsasaludaran han Efren Martires Command an bug-os nga kaapihan han hukbo han katawhan ha Eastern Visayas ha maisugon nira nga pagpupursige ha dalan han gerra han katawhan. Ha ura-ura kamalipayon nga okasyon han aton anibersaryo, mas natatagan hira hin rayhak atubangan han mas nagigin paborable nga kundisyon ha sakob ngan gawas han nasud para ha pagpapasulong han gerra han katawhan. Nakatanum ha kasingkasing ngan hunahuna nira an hilarum nga hingyap han katawhan Pilipino, labina han masa nga anakbalhas, nga ipakigbisog an ira katungod ngan rebolusyunaryo nga ungara tubtub ha marumpag an estado ngan matapos an gin-uundong hini nga pakuri ngan nadudunot nga sistema nga bagakolonyal ngan bagapyudal.

Ginlalasurbo an katawhan han Eastern Visayas han waray katupong nga atake han imperyalismo, pyudalismo ngan burukrata kapitalismo. Padayon nga gin-uungbawan an nasud han imperyalismo nga US nga gin-gagamit an mga kumprador burgesya, agaron maytuna ngan burukrata kapitalista agud igpabilin nga atrasado, agrikultural ngan tinong an ekonomiya. Ha Eastern Visayas, pinakaginlalauman nira an mga dinastiya nga Romualdez, mga kaurupdan han puno nga papet nga hi Ferdinand Marcos Jr, sugad liwat an mga Tan han Samar, Evardone han Eastern Samar, Ongchuan han Northern Samar, Mercado han Southern Leyte, ngan Espina han Biliran. Ginsusuportahan nira an pagsulod han mga lokal ngan langyaw nga kapital nga an interes gud la an dambungon an natural nga karikuhan ngan kusog-pagtrabaho han katawhan para ha kalugaringon nga kapulsanan. Kadungan hini, nakakapagpariko ngan nakapagpapabilin ha poder ini nga mga dinastiya pinaagi han pagdambong ha pondo han katawhan ngan pagsingabot ha ira pusisyon.

Padayon nga naluludlod an hiluag nga mamamayan han Eastern Visayas ha makaluluoy nga kamutangan. Mga parag-uma an nakomponer ha 85% han populasyon, kundi walo ha kada 10 ha ira waray kalugaringon nga tuna. An hiluag nga agrikultural nga katunaan nakaalutaga diri ha pagkaon kundi ha mga produkto nga pan-eksport sugad han lubi ngan abaka—mga cash crop nga bulnerable ha pagbabag-o han panahon (climate change) ngan ha mga pagbabag-o han suplay ngan demand ha pankalibutan nga merkado. Tungod ha kawaray hin tuna, nahihigot an mga parag-uma ha grabe kamatiyupion nga mga kaayusan sugad han kaayusan nga “75-25” pabor ha agaron maytuna, mapan-usura nga pagpapautang, ngan himubo na suhol. Gin-aabre an mga bukid, salog ngan tuna nga umhanan ha pagmimina ngan kumbersyon para matindugan han mga mapanhibang nga proyekto nga “renewable energy” ngan ekoturismo para ha kapitalista nga tubo.

Natikabagsak pa an kalidad han panginabuhi han katawhan. Katunga han mga trabahador ha rehiyon diri matatawag nga tinuod nga trabahador nga sinuhulan tungod kay “self-employed” hira nga diri regular nga nakakakarawat hin suhol (sugad han mga drayber han dyip, parupaninda, ngan gig workers), o nagtatrabaho ha umhanan o negosyo han pamilya diin 10% ha ira waray suhol. Diri makatawo an ₱450 nga minimum nga inadlaw nga suhol nga diri makaduyog ha dirudiretso nga paghitaas han implasyon ngan kaagsuban pa ngani diri naman nasusunod. Pirmihan nga kalakip an Eastern Visayas ha mga rehiyon nga mayda pinakadamo nga ihap han pamilya ngan populasyon nga nagkukuri.

Ginpaparayaw han pasista nga rehimen Marcos an terorismo han estado agud puypuyon an rebolusyon ngan igpadayon an paniniyupi han naghahadi nga klase ha katawhan. Tikang 2017, ginpangunahan han 8th Infantry Division an mga gradual constrition-sustained focused military operations (GC-SFMO) ha rehiyon nga nagtumuyo nga ihimulag an BHB ha iya base panmasa ngan mahiduso ha mga lus-ay-militar nga sitwasyon para ha mapagdesisyon nga pagkakalipol. An base-denial ginlalakipan han pira kabulan o katuig nga pagsakop han mga pasista nga tropa ha magkaranit nga mga baryo agud maghimo han saywar ngan targeted nga panmatay ha masa, igpailarum an mga komunidad ha hamlet (“lockdown”) nga nahibang ha panginabuhi han mga residente, magtukod han mga aset-paniktik, bungkagon an mga asosasyon han mga parag-uma, ngan umungbaw an militar nga paghahadi ha sibilyan nga gubyerno. An mga sustenido nga nakapokus nga operasyon militar naman ginhimo han mga pormasyon nga multi-kolum ngan nagsasarusaliwan, hin mayda direksyon han brigada o dibisyon ngan mobilisasyon han mga air asset sugad han mga drone ngan jet fighter, ha bug-os nga mga klaster ha mga bawnderi han mga bungto agud malanat an mga yunit han BHB. Ha butnga o kadungan han mga operasyon ginhihimo an waray wantas nga pangingistraping, panganganyon o panmomba han mga kagugub-an ngan umhanan nga lugar han panginabuhi han masa nga parag-uma.

Ha pinakarubas, diri bag-o an sugad nga kamutangan han Eastern Visayas. Antes pa man nahitukod an BHB hadton 1969, o nahilansar an pinakasyahan nga taktikal nga opensiba ha Calbiga, Samar hadton 1974, sugad liwat hini an kamutangan han katawhan han rehiyon: konsentrado an karikuhan ha pipira nga naghahadi nga klase, samtang an hiluag nga katawhan nagugutom ngan nagkukuri, ngan nagtikang ini tikang han ig-imponer han imperyalismo nga US an sistema nga bagakolonyal ngan bagapyudal ha nasud. Ngan ilarum han presente nga rehimen Marcos Jr, natikatarum pa ini nga batakan nga kontradiksyon.

Sanglit usa nga dako nga kalurungan an ginpapasamwak han reaksyunaryo nga gubyerno nga an BHB an nakakaulang ha kauswagan han katawhan. Lugod, an BHB gin-anak han natikadunot nga pakuri nga sistema, nga amo an ulang ha pag-uswag. Iginbunga an BHB han naglalarab nga karuyagon han katawhan nga katinan an armas agud bag-uhon an ira kamutangan. Ngan ha paggrabe han kakurian ngan pasismo, mas natatagan ini hin higayon nga magrabong ngan sumamwak ha bug-os nga kamurupud-an.

Ha luyo han ginpapintas ngan waray hunong nga pasista nga terorismo han estado ha nakalabay nga siyam katuig, padayon nga nakakagpursige an mga yunit han BHB ha Eastern Visayas. Diri mahuhuman an BHB tungod la kay mayda pipira nga elemento nga ginbutad an magraut nga kinaiyahan ngan kawaray hin pagremolde, binaya, ginlingo an rebolusyon ngan masa ngan yana binaydan na nga ahente han mga pasista. An mga nahiaguman nga destroso han BHB ha nakalabay nga mga tuig—nga diri malilikyan ha proseso han paglansar han panmaihaan nga gerra han usa nga maluya nga pwersa kontra ha mas makusog nga pwersa—prinsipal pa nga ginbunga han mga internal nga kaluyahan, ngan diri han sayop nga prinsiyo o kasaypanan han armado nga pakig-away.

Tikang han bumuylo an ikatulo nga kagiusan pagtutul-id hadton 2023, maupay na nga natudlok han mga yunit han BHB ha Eastern Visayas an mga kasaypanan han suhetibista nga empirisismo, nga nag-anak han konserbatismo, pagpahaligot-ha-kalugaringon, ngan panhunahuna nga “kuta nga bukid.” Labaw san-o man, santop ngaduha han mga beterano ngan bag-uhan nga Pula nga kumander ngan mangaraway an dako kaupay nga panginahanglan han mahugot nga pagsapol ha integral nga sumpayan han armado nga pakikibaka, agraryo nga rebolusyon, ngan pagtutukod han base panmasa. Santop hini an diri bisan san-o nga mauutod nga sumpayan han BHB ngan masa, tungod kay ginpapasulong han BHB an hingyap han masa nga matalwas ha pananalumpigos ngan paniniyupi. Tungod hini, aada ha maupay nga pusisyon an Partido, BHB ngan bug-os nga rebolusyunaryo nga kagisan agud utro nga magpakusog ngan umani hin dugang nga mga kadaugan.

Dako gud an panginahanglan para ha BHB nga pursigido nga ipasulong an gerra han katawhan. Naatubang an katawhan ha sakob ngan gawas han nasud han grabe nga pan-ekonomiya, pampulitika ngan pankatilingban nga kasamukan. Butaray na nga nagsasabrag hin gerra an numero uno nga terorista nga imperyalista nga US ha mga nasud nga nag-iinsister han soberaniya, ngan nagsusulsol hin sumpakiay ha mga karibal nga imperyalista, ha katuyuanan nga mahakin an mga importante nga pankalibutan nga rekurso. Ginhihimo hini nga lansara han gerra an mga neokolonya hini sugad han Pilipinas, agud gamiton ha ginluluto nga proxy nga gerra kontra ha China. An papet hini nga hi Marcos Jr mas nahihimulag ha katawhan tungod ha pagigin pakuri, pasista, korap ngan waray pulos hini, ngan gintututdo ha ira an dalan han rebolusyunaryo nga pag-ato.

Gerra an diri malilikyan nga hingaradtuan han imperyalismo. An kawaray-kabusugan han mga monopolyo kapitalista nga makig-agaway ha rekurso ngan merkado nahingangadto ha butaray nga gerra giutan han mga nasud ngan ha redibisyon han kalibutan. Imperyalismo liwat an nag-anak ha pasismo, nga gin-gagamit han mga papet nga rehimen ha mga nasud nga neokolonyal agud puypuyon an rebolusyunaryo nga pag-ato han katawhan. Importante nga gamuton han BHB ngan han bug-os nga rebolusyunaryo nga kagiusan an pasismo han estado ngan imperyalista nga gerra ha makaklase nga katuyuanan hini, agud masantop kun kay ano nga kinahanglan han rebolusyunaryo nga pakigbisog nga ginpapamunuan han Partido, ngan ha usa nga nasud nga bagakolonyal ngan bagapyudal kinahanglan han hukbo han parag-uma sugad han BHB, para pakyason an pasismo, atuhan an imperyalismo ngan kab-uton an tinuod nga kamurayawan ngan kauswagan.

Andam an BHB ha Eastern Visayas nga sugbungon an ngatanan sakripisyo para ipasulong an gerra han katawhan tubtub ha hul-os nga kadaugan. Maluya ngan guti man yana, kaupod an masa ngan ha pamumuno han Partido kaya hini nga magin dako ngan gamhanan nga pwersa nga magrurumpag ha papet ngan pasista nga estado ngan tukuron an sosyalista nga kabubwason.

Mabuhay an Bagong Hukbong Bayan! Mabuhay an katawhan nga naato!
Mabuhay an Partido Komunista ng Pilipinas!
Katawhan Pilipino, umapi ha gerra han katawhan! Tapuson an papet, pasista, korap ngan waray pulos nga rehimen US-Marcos!