Download: PDF

Binabati ng buong kasapian ng Katipunan ng mga Gurong Makabayan (KAGUMA) ang ika-56 taong pagkakatatag ng Partido Komunista ng Pilipinas (PKP-MLM) sa maningning at puno ng determinasyong pamumuno sa rebolusyong Pilipino. Inilagay nito sa tamang direksyon ang pakikibaka ng mamamayang Pilipino mula sa mga kamalian ng pinagsanib na Partido, sosyalista at komunista, sa pamumuno ng mga Lava at Taruc, at tinahak ang bagong demokratikong rebolusyong bayan na may sosyalistang perspektiba sa pamumuno ng mga proletaryado sa pamamagitan ng pagkakatatag ng Partido Komunista ng Pilipinas noong Disyembre 26, 1968. Iwinasto ang mga malalaking pagkakamali nang inilunsad nito ang Ikalawang Dakilang Kilusang Pagwawasto (IDKP) noong 1992 mula sa muntik ng pagkalusaw ng Partido dahil sa mga pagkakamali ng mga rebisyunistang taksil na nakapasok sa pamunuan ng Partido at nakapag-impluwensya sa ilang bahagi ng rebolusyonaryong kilusan. Habang sa kasalukuyang yugto ay mapagpakumbaba ang buong kasapian at mga namumunong kadre’t opisyal ng Partido na nagwawasto sa mga kamaliang dulot ng suhetibistang pagkakamali pangunahin sa porma ng empirisismo.

Buong pusong nagpapasalamat din ang KAGUMA sa pundasyong inilatag ng pangulong tagapagtatag ng Partido Komunista ng Pilipinas na si Prof. Jose Maria Sison sa tamang paglalapat ng Marxismo-Leninismo-Maoismo sa kongkretong kalagayan ng lipunang Pilipino. Dalawang taon na mula nang pumanaw ang dakilang komunistang Pilipino na si Joma Sison subalit bitbit ng bawat komunista at mga rebolusyonarong Pilipino ang mga dakilang aral na naisulat, pinag-aralan at isinapraktika ng bawat rebolusyonaryo sa pang-araw-araw na paggampan at pagsulong ng mga gawain. Kasabay ng pagpupugay sa ika-56 na anibersaryo ng Partido ay ang pagdakila sa iba pang mga dakilang martir ng rebolusyon na nag-ambag sa pagpupundar, pagpapalaki, pagbaka sa mga kamalian at kahinaan, at pagsulong ng rebolusyong Pilipino. Patuloy na naniniwala ang buong kasapian ng KAGUMA na sa pamamagitan lamang ng tagumpay ng demokratikong rebolusyong bayan pangunahin sa pagsusulong ng armadong pakikibaka sa kanayunan makakamit ang pangmatagalang ginhawa ng mga guro at buong mamamayan na matagal nang pinagkakait ng mga reaksyunaryong rehimen sa ilalim ng atrasadong mala-kolonyal at mala-pyudal na lipunang Pilipino.

Hanggang patuloy na naghahari sa lipunan ang mga malalaking burgesya komprador at mga panginoong maylupa kasabwat ang mga kurakot na burukrata na pinapatakbo na parang mafia at sindikato ang gobyerno at ang pagiging papet nito sa mga imperyalista partikular ang US ay patuloy na mararanasan ng sambayanang Pilipino ang walang kaparis na mga krisis at paghihirap. Patuloy ang pagsirit ng mga presyo ng mga pangunahing bilihin laluna ang bigas, petrolyo at mga batayang pangangailangan ng taumbayan, habang walang awat naman ang paglaki ng tubo ng mga kapitalista at mga kasabwat nito sa bulok na gobyerno. Patuloy ang pagpapatupad ng mga batas at patakaran na lalong naglulublob sa kumunoy ng kahirapan sa malaking mayorya ng mamamayan. Patuloy na pinapako ang sahod ng mga manggagawa sa pribado at maging ng mga kawani sa pamahalaan tulad ng mga guro sa pampublikong paaralan sa antas ng hindi nakakabuhay na sahod at busabos na kalagayan.

Kaya naman, wala nang iba pang paraan para wakasan ang siklo ng mga pasakit at paghihirap ng mga guro at buong mamamayan kundi ang direktang paglahok at sa minimum ay ang aktibong pagsuporta sa armadong pakikibaka para maipagtagumpay ang demokratikong rebolusyong bayan. Magpursigi tayo sa pagmumulat, pag-oorganisa at pagpapakilos ng masang guro, mga kawani at iba pang sektor na inaabot ng ating rebolusyonaryong pagkilos at gawain para sa demokratikong rebolusyong bayan. Agresibo nating itayo ang mga balangay ng KAGUMA sa loob ng mga paaralan kapwa sa pampubliko at pribadong mga paaralan at iba pang mga rebolusyonarong kilusang lihim ng ibang sektor at uri. Direktang mag-ambag ng lakas at talino para sa ibayong pagpapalakas ng rebolusyonaryong kilusang guro at KAGUMA na magsisilbi sa muling pagapapalakas at pagpapasigla ng armadong pakikibaka pangunahin sa kanayunan. Paramihin natin ang mga rekurso at mga materyal na suporta para sa ating hukbong bayan o New Peoples Army. Sa mga rebolusyonaryong propesyunal na guro, mga kawani at mga mag-aaral sa sektor ng edukasyon, planuhin at sistematikong iprograma ang buong panahon na pagkilos at pakikipagkaisa sa mga batayang sektor laluna sa mga magsasaka at katutubo sa kanayunan hanggang sa tuluyang makipamuhay sa kanila at makapag-ambag sa pagtuturo sa praktika ng pagrerebolusyon. Ilantad ang kasinungalingang buong-kahambugang ipinalalaganap ng AFP, PNP, NTF-ELCAC at ng buong reaksyunaryong estado na “insurgency-free” na sa maraming probinsya sa kabila ng tuluy-tuloy na deployment nila ng mga bata-batalyong pangkombat sa kanayunan na naglilikha ng takot at ligalig sa mamamayan. Ang tuluy-tuloy at papaigting na militarisasyon sa kanayunan ay patunay lamang na patuloy ang armadong paglaban ng mamamayan at ng hukbong bayan. Hangga’t umiiral ang malakolonyal at malapyudal na lipunan, ang pagusulong ng pambansa demokratikong rebolusyon sa pamumuno ng Partido ay hindi kailanman magagapi.

Sa panghuli, muling nagpupugay ang KAGUMA sa wasto at matuwid na pamumuno ng Partido Komunista ng Pilipinas sa rebolusyonaryong kilusang guro at buong rebolusyong Pilipino. Kaisa ang buong kasapian ng KAGUMA sa isinusulong na kilusang pagwawasto ng Partido para sa mas higit na konsolidasyon sa pulitika ng buong kasapian nito para sustenidong makapag-ambag sa pangkalahatang pagsulong ng digmang bayan hanggang sa tagumpay nito.

Mabuhay ang ika-56 anibersaryo ng Partido Komunista ng Pilipinas! Guro at mamamayan, tumungo sa kanayunan; sumapi sa Bagong Hukbong Bayan; lumahok sa digmang bayan! Ibagsak ang papet, bulok at pasistang rehimeng US-Marcos!