Ipinaaabot ng Jose Rapsing Command-New People’s Army, pamprubinsyang kumand ng Masbate ang taos-pusong pagbati ng “Maligayang ika-57 taong anibersaryo sa ating muling tatag na Partido Komunista ng Pilipinas (PKP). Kasabay nito, binabati rin ng pamprubinsyang kumand ang masang Masbatenyo at lahat ng mga kasapi ng Partido at pulang Hukbo na patuloy na hinaharap ang mga sakripisyo at hamon sa walang kapagurang pagsusulong ng armadong pakikibaka sa prubinsya.

Kasabay din ng ating pagdiriwang ay ang pag-alala sa mga kasama at masang nag-alay ng kanilang buhay sa pagsisilbi sa bayan. Ibinibigay ng JRC-NPA Masbate ang pinakamataas na pagsaludo at pagpupugay sa kanila na buong giting na lumaban para sa kapakanan ng mamamayan at sa minamahal nating bayan. Ang kanilang mga makabuluhang ambag sa pakikibaka at alaala ay mananatiling nakatatak sa puso at isipan ng lahat ng Pulang mandirigma at masang Masbatenyo. Inspirasyon sila sa pagtangan ng armas ng mga nagpapatuloy at magpapatuloy ng kanilang yapak sa pagsusulong ng demokratikong rebolusyonaryon ng bayan. Ang magbibigay wakas sa malakolonyal at malapyudal na lipunang Pilipino na kinukubabawan ng imperyalismo, burukrata-kapitalismo at pyudalismo.

Sa pamumuno ng ating Partido, umabot na sa mahigit apat na dekada ang ating pagsusulong ng armadong paglaban sa Masbate. Nagsimula tayo sa iilan at mahina habang dati-rati nang mas marami at mas malakas ang ating kalaban na simula pa lang ay hindi na tayo tinantanan na durugin nang tuluyan. Subalit, dahil sa mahusay na pamumuno ng ating Partido at mahigpit nating pagtangan ng prinsipyo ng matagalang digmang bayan, tayo’y nakapagkamit ng mga tagumpay, nakapagpalawak, dumami at lumakas. Patunay ito na hindi tayo mahahadlangan ng anumang pakana ng reaksyonaryong pamahalaan na pinaghaharian ng mga panginoong maylupa at malaking burgesya kumprador na sunud-sunuran sa dikta ng imperyalistang US at pinatatakbo bilang negosyo ang gubyerno upang magkamal ng yaman at pagnakawan ang bayan.

Dumanas man tayo ngayon ng pag-atras dahil sa mga lumitaw na kahinaan at pagkakamali, hindi ito nangangahulugan ng pagkabigo at pagkagapi na ng ating armadong paglaban. Sa halip, panibago itong pahina na magbibigay sa atin ng aral na magiging sikaran upang tayo ay umigpaw sa mas mataas na antas. Dagdag pa, ang mahigit apat na dekada nating pagsusulong ng armadong paglaban na hitik sa mayamang karanasan na ngayon ay muli nating isinasapraktika batay sa obhetibo nating kalagayan ay malaking tulong sa ating muling pagpapalakas at pagsulong.

Ang mga ilinulunsad na militarisasyon, kasabay ng pang-aagaw ng mga rantsero at panginoong maylupa sa kabuhayan at lupa ng mga magsasaka at pagdambong ng mga dayuhang korporasyon sa yaman ng prubinsya. Ang pagnakaw at pagpapakasasa sa mga nasa kapangyarihan sa pera ng bayan habang lumulutang sa kawalan ng hanapbuhay at pagkakakitaan at pagkalubog sa hindi mabayarang mga utang dahil sa labis na kahirapan ang magtutulak sa mga Masbatenyo upang patuloy na humawak ng sandata at makibaka. Ang kanilang nararanasang mga kaapihan at pagsasamantala ang hindi matutuyong bukal ng armadong paglaban at nariyan ang Partido upang ito ay pamunuan.

Ang mga naghahari-harian sa ating bayan, sila mismo ang gumagatong upang lumakas ang apoy ng pakikibaka sa kanayunan na kakalat patungong kalunsuran, susunog sa kanila at tutupok sa pader ng reaksyonaryong estado.

Sa pamumuno ng ating Partido, ang BHB ang mahigpit na kakampi ng mamamayan at inaaasahan upang maigawad ang tunay na katarungan at hustisya sa lahat ng biktima ng karahasan at pamamaslang ng estado. Mabawi ang dapat ay sa kanila at matamasa ito ng may kalayaan at makatarungan. At higit sa lahat, kaisa nila upang wakasan ang malakolonyal at malapyudal na lipunan at maipagtagumpay ang demokratikong rebolusyon ng bayan.

Inaanyayahan ng JRC-NPA Masbate ang mamamayang Masbatenyo laluna sa hanay ng kabataan na nasa hustong edad at may malusog na pangangatawan at isipan na sumapi sa Bagong Hukbong Bayan (BHB). Magkaisa, magtulungan at sama-sama nating harapin, labanan at panagutin ang mga berdugong militar at pulis na yumuyurak sa ating karapatan.

Bawiin natin ang ating mga lupang kinamkam ng mga lokal na rantsero, panginoong maylupa at mga dayuhang korporasyon. Palayasin natin ang mga dayuhang dumadambong sa kayamanan ng ating prubinsya. Higit sa lahat, singilin, panagutin at patalsikin natin ang papet, pasista, taksil at hari at reyna ng kurakot na si Ferdinand Marcos Jr at Sara Duterte at panagutin ang lahat ng sangkot ng pagnanakaw sa pera ng bayan.

Ang ating dakilang hangarin na gawing tunay na mapayapa at maunlad ang ating minamahal na prubinsya ay makakamit lamang kung walang mga ganid sa kapangyarihan at mandarambong sa ating bayan. Tangan ang panawagan ng ating Partido na magpalakas habang lumalaban at lumalaban habang nagpapalakas, kailangang ang BHB ay kumilos at manguna sa pagsasakatuparan nito sa pamamagitan ng paglulunsad ng mga taktikal na opensiba upang bigwasan at samsamin ang mga armas ng mga berdugong militar kasabay ng muling pagpapalawak at pagpapalakas sa ating hanay habang mahigpit na pinapanghawakan ang prinsipyo ng matagalang digmang bayan.#

Mabuhay ang ika-57 taong anibersaryo ng Partido Komunista ng Pilipinas!

Mabuhay ang mamamayang patuloy na lumalaban!

Mabuhay ang Bagong Hukbong Bayan!

Sumapi sa Bagong Hukbong Bayan!

Isulong ang Pambansa-Demokratikong Rebolusyon!