Lubos nga ginkondenar sang Mount Cansermon Command-New People’sArmy (MCC-NPA) ang brutal nga pagpatay sa isa ka mangunguma sa Sityo Dangalon, Brgy Hilamunan, Kabankalan City, Negros Occidental sadtong Mayo 3, pasado alas 4:00 sang hapon matapos ang natabo nga engkwentro sa tunga sang tropa sang 94th IB kag yunit sang NPA sa amu nga lugar. Nakilala ang biktima nga si Crispin “Padon” Tingal Jr, lapit 40 anyos ang pangidaron kag naga-estar sa amu man nga lugar.

Base sa imbestigasyon, dali-dali nagpuli si Padon sa ila puluy-an sang nabatian niya nga may mga militar nga nagapangransak sa ila lugar. Halin siya nagtambong sang meeting sa asosasyon sa mangunguma sa syudad sang gindakop siya sa mga katapo sang 94th IB sang nagalakat sa dalan. Matapos ang engkwentro lapit sa ila balay, gin-imbestigar siya samtang ginakastigo. Nabatian pa siya sang iya utod nga nagasinggit kag nagapangayo bulig. Makapila ka beses siya nagsinggitan kag sang palapitan na kon tani siya sa iya utod ginlagas naman ang iya utod sang mga militar kag ginpalukpan. Sa ulihi, nabatian na lang sa iya utod nga naga-agulo na lang kag nakita nga ginsulod sa sako si Tingal.

Madumduman nga sadtong ligad lang Disyembre 26, 2022 isa man si Padon sa biktima sang siyam tanan ka panimalay nga ginpangransak sang militar. Biktima sang grabe nga pagpamahug, intimidasyon kag iban pa nga porma sang kalapasan ang pamilya Teruel kag Tingal kag iban pa sa amu nga sityo. Ginpatawag ini sila kag ginpagwa sang militar nga kuno mga surrenderees.

Dugang ini, liwat naman ginransak ang balay sa mga utod ni Padon kag iya mga tiyo. Ginkuha pa sang militar ang kwarta kag alkansya sang mga balay nga ila ginransak.

Ginpanginwala kag ginpakamalaot sang MCC-NPA ang pahayag ni Lt.Col Van Donald Almonte, ang 94th IB Commander, nga isa ka NPA ang ila ginpatay nga si Padon. Klaro nga isa ka mangunguma ang biktima sang ila operasyon. Baliskad kag kabutigan ang ila ginapagwa nga katapo ini sang NPA. Ginhinabunan sang 94th IB ang ila kapaslawan kag kaswalidad. Daan na ini nga modus operandi sang militar sa ila mahigko nga gyera kontra pumuluyo.

Matuod nga may engkwentro nga natabo sa lugar pero hilway nga nakamaniobra kag nakaatras ang tanan nga tropa sang NPA nga wala sang kaswalidad.

Ginapanawagan sang MCC-NPA ang maid-id nga imbestigasyon sa sini nga insidente. Pasabton ang tropa sang 94th IB sa ila mga kalapasan. Kadungan man sini, ginapanawagan man naton sa bilog pumuluyo kag sa mga pamilya sang biktima sang mga kalapasan sang militar nga mag-isa para lab-oton ang hustisya. Dapat ipakigbato nila ang ila kinamatarung batuk sang mga pagpanghalit kag pagpang-atake sang militar sa ila. Ginapawagan man sang MCC-NPA ang mga taong-simbahan, human rights advocates, LGU kag iban pa nga buligan ang pumuluyo labina ang mga mangunguma dire sa kabukiran nga nanguna nga biktima sang militarisasyon sang AFP-PNP/NTF-ELCAC.