Patay si Corporal Rodney Luces samtang pilason naman si PFC Kiel Charles Pama sang 62nd IBPA sa madinalag-on nga sniping operation sang New People’s Army sa Purok Dalaupan, Brgy Carabalan, Himamaylan City, Negros Occidental mga alas 6:30 sang aga sadtong Hunyo 9, 2021.

Nagapanginbulahan ang Mount Cansermon Command New People’s Army South Central Negros Guerrilla Front sa mga isganan nga pulang hangaway sa gintigayon nga opensiba batok sa hanay sang 62nd IBPA nga nagtuga sang kaswalti sa ginhinambitan nga pasistang tropa.

Ang taktikal nga opensiba sang NPA sa South Central Negros ang sabat sa madugay na nga ginapangayo nga hustisya sang mga biktima sang paglapas sang tawhanon nga kinamatarung kaangay sa pagpamahug, ilegal nga pagpang-aresto kag pagpamatay sa mga mangunguma, aktibista kag iban pa nga nagahimakas nga pumuluyo para sa matuod nga reporma sa duta kag pungsodnon nga industriyalisasyon diin mapaluntad ang tunay nga kahilwayan kag demokrasya.

Wala sang ikaduha pa nga hugna sang inaway sa tunga sang New People’s Army kag tropa sang 62nd IBPA sa iban pa nga lugar sang Himamaylan sadto nga panahon. Taliwas ini sa pahayag ni Maj. Cennon Pancito nga tagtaghol sang 3ID Philippine Army. Ang matuod naghuramintado kag desperado nga ginpaarakan sang nasambit nga tropa militar si Elmer Kisan samtang nagapatigayon ang militar sang hot pursuit operation matapos sang pila pa ka oras ang nagligad sa natabo nga sniping operation nga ginlunsar sang New People’s Army sa lugar. Si Kisan ang isa ka inosenteng mangunguma kag aktibo nga trabahante sang Mosser Foundation. Hungod nga gintiro-patay sang militar si Kisan sa pagtimalos kag paghinabon sang ila kalutusan nga nagtuga sang kahalitan sa ila hanay.

Mabaskog nga ginakondenar sang MCC-NPA ang pagpinalupok sang tropa militar ilabe na gid ang patarasak nga pagpamomba sini gamit ang mortar sa mga kalasangan sa binukid sang Brgy Carabalan, Himamaylan City, Negros Occidental. Nagtuga ini sang kahadlok kag kakugmat sa pumuluyo. Halos indi na makakadto sa ila uma kag bisan pa sa pag-atipan sang ila mga kasapatan. Nadislokar ang pangabuhian sang pumuluyo bangud sang madata nga operasyon militar sang pasistang tropa sang 62nd kag 94th IBPA.

Indi bala kag indi militar ang nagapanguna nga ginakinahanglan sang mga mangunguma. Kundi duta nga palangabuhian, matarung nga sweldo, nagakaigo nga serbisyo sosyal kag ayuda sa pihak sang grabe nga gutom tuga sang coronavirus nga pandemya sa pagkakaron.

Ginakondenar man sang Mount Cansermon Command New People’s Army ang ilegal nga pag-aresto sa 2 ka mga mangunguma sa Brgy Buenavista nga sanday Kenneth Nabong kag Jayson John Gazon sadtong Hunyo 9, 2021 alas 11:00 sang kagab-ihon. Gintorture, pilit nga ginpa-ako nga mga katapo sang NPA kag ginapilit man nga kabahin sila nga 2 sa yunit sang NPA nga nag-snipe sa ila tropa sa Purok Dalaupan, Brgy. Carabalan alas 6:30 sang aga. Para may ibendensya nga makuha sa kay Kenneth kag Jason, gintamnan sila nga duha sang 2 ka 45 cal. pistol, mga bala kag magasin sang desperado nga kombinado nga tropa sang 94th kag 62nd IBPA.

Nagduging ang pagpanglapas sang tawhanon nga kinamatarung sa Central Negros bunga sang wala-untat nga operasyon militar sa binukid sang Himamaylan, Binalbagan, Kabankalan, Tayasan kag bahin sang Jimalalud bangud gusto pahugon kag puhagon sang militar ang pumuluyo nga nagapuyo palibot sa bukid sang Cambantug-Tahud Ilahas paagi sa mando ni Ramon Ang. Si Ramon Ang, nagapakilala nga tag-iya sang masobra 1,100 hektaryas nga kalaparon sang duta nga tuyo pagaminahon. Kon ipadayon ang pagmina, apektado ang pananum, duta nga ginataluma kag iban pa nga palangabuhian sang masobra 1,000 ka pamilya kag pamalay katumbas sang 5,000-6,000 ka indibidwal. Indi magnubo sa 10 ka baryo palibot sa nasambit nga lugar nga pagaminahon gikan sa 5 tanan ka banwa kag syudad sa sakop sang Negros Oriental kag Occidental ang apektado. Ma-apektuhan man ang mga kasubaan palibot sini nga lugar kaangay sang Paniplan, Hilabangan, Pacuan kag iban pa nga mga kasubaan kag kasapaan malapit sa ginabuko nga pagaminahon.

Samtang naga-antus sa gutom kag kapigaduhon ang pumuluyong Pilipino sa tunga sang pandemya, madata man ang pagpanghimulos sang dumuluong nga minahan sa pungsod. Ini ang resulta sang lubos nga pagpatuman sang neo-liberal nga polisiya ilabe na ang pagdula ni Duterte sang moratorium sang makahalalit kag maki-dumuluong nga pagmina sa pungsod. Nagakahulugan nga gusto patuyangan sang rehimeng Duterte ang pagkamasa sang mga dumuluong nga kapitalista sa dunang manggad sang pungsod kaangay sa talawan kag traidor nga panindugan ni Duterte kag mga alipuris sini sa West Philippine Sea batok dumuluong kag hakugan nga pungsod China.

Klaro nga inutil ang pasistang AFP, PNP kag rehimeng US-Duterte nga depensahan ang interes kag sobereniya sang pungsod Pilipinas. Kabaliskaran ang ila ginawakal nga sila ang tagpangapin sang pumuluyong Pilipino. Wala sila nagatib-ong sang demokratikong interes sang kadam-an kag pigos nga pumuluyo, kundi sila ang tagpangapin sang interes sang mga mga nagahari nga sahi ilabe na sang agalon may duta, dalagkong komprador burgesya kag dumuluong monopolyo kapitalista.

Indi mahadlok, maghugpong kag maghimakas! Isulong ang armadong paghimakas! Ilunsar ang lapnagon kag madinalag-on nga taktikal nga opensiba kag rumpagon ang rehimeng US-Duterte!